پاکستان کی غذائی ضروریات کے حوالے سے صرف غلے کی بجائے پھلوں اور دیگر فصلات پر بھی بھر پور توجہ دینا ہو گی، ماہرین جامعہ زرعیہ

پیر 2 اکتوبر 2023 12:13

فیصل آباد (اُردو پوائنٹ اخبارتازہ ترین - اے پی پی۔ 02 اکتوبر2023ء) جامعہ زرعیہ فیصل آباد کے زرعی ماہرین نے کہا کہ پاکستان کی غذائی ضروریات کے حوالے سے صرف غلے کی بجائے پھلوں اور دیگر فصلات پر بھی بھر پور توجہ دینا ہو گی کیونکہ صرف غلے پر انحصار کرکے ملک میں غذائی استحکام کو یقینی نہیں بنایا جاسکتا نیز موجودہ کاشتکاری نظام میں جینیاتی اور دیگر جدتوں کو اپنائے بغیر پیداواریت کا جمودبھی توڑنا ممکن نہیں۔

انہوں نے بتایاکہ دنیا کی تیزی سے بڑھتی ہوئی آبادی کی غذائی ضروریات پوری کرنے کیلئے زرعی شعبے میں مالیکیولر ٹیکنالوجی اور بریڈنگ کے جدید رجحانات متعارف کرانا ہوں گے ۔ انہوں نے زرعی ماہرین پرزور دیا کہ وہ چھوٹے کسانوں کو جدید ٹیکنالوجی منتقل کرنے کیلئے کوششیں بروئے کار لانے پر خصوصی توجہ مرکوز کریں۔

(جاری ہے)

انہوں نے بتایاکہ یونیورسٹی کے طلبہ کو ہارٹیکلچر، لینڈ سکیپنگ اور پوسٹ ہارویسٹ شعبوں میں جدید خطوط پر تربیت دینے کیلئے انسٹیٹیوٹ آف ہارٹیکلچرل سائنسز مختلف تربیتی ورکشاپس کا ہتمام کرتا چلا آرہا ہے۔

انہوں نے کہا کہ مالیکیولر ٹیکنیک کے استعمال پر انہیں نئے علوم تک رسائی میں مدد مل سکے گی۔ انہوں نے کہا کہ لوگوں کو نیوٹریشن کے لحاظ سے اپنی غذا کے انتخاب میں وسعت لانا ہوگی۔ انہوں نے کہا کہ پاکستان میں غیر روائتی فصلوں اور پھلوں کو فروغ دینے کیلئے عملی اقدامات بروئے کار لانے کی بھی اشد ضرورت ہے۔