خوردنی تیل میں خودکفالت کا حصول،محکمہ زراعت کا تیلدار اجناس کی پیداوا رمیں اضافہ کیلئے مقابلوں کا اعلان

پیر 2 اکتوبر 2023 16:55

ملتان (اُردو پوائنٹ اخبارتازہ ترین - اے پی پی۔ 02 اکتوبر2023ء) کینولہ کے پیداواری مقابلہ میں حصہ لینے کیلئے کاشتکاروں سے درخواستیں طلب کرلی گئیں۔ ترجمان محکمہ زراعت پنجاب کے مطابق قومی زرعی ایمرجنسی پروگرام کے تحت 5 ارب 11 کروڑ روپے کی لاگت سے منصوبہ پرعملدرآمد جاری ہے۔اس منصوبہ کے تحت ملتان، خانیوال، لودھراں، مظفر گڑھ، وہاڑی، بہاولپور، بہاولنگر، بھکر، فیصل آباد، جھنگ، سرگودھا، ٹوبہ ٹیک سنگھ، اوکاڑہ، میانوالی اور قصور کے 3 یا 3 ایکڑ سے زائد قابل کاشت اراضی کے مالک مرد و خواتین کاشتکار درخواست دینے کے اہل ہوں گے۔

اس سلسلے میں مشترکہ کھاتہ رکھنے والے کاشتکار بھی اہل ہوں گے نیز مزارعین/ ٹھیکید ار بھی دستاویزات کی تحصیل کمیٹی سے تصدیق کرانے کے بعد درخواست دے سکتے ہیں۔

(جاری ہے)

پیداواری مقابلہ میں حصہ لینے والے کاشتکار 3 ایکڑ متصل فصل کینولہ جس میں کوئی بھی محکمہ زراعت پنجاب کی منظور و تصدیق شدہ اقسام کاشت کی گئی ہو مقابلہ کے لئے پیش کر سکیں گے۔ مقابلہ کے لئے شرائط درخواست فارم پر درج ہیں جو متعلقہ ڈپٹی ڈائریکٹر اور ڈویژنل ڈائریکٹر کے دفتر سے مفت حاصل کر سکتے ہیں یا محکمہ زراعت کی ویب سائٹ www.agripunjab.gov.pk سے ڈاؤن لوڈ کئے جا سکتے ہیں۔

فارم فوٹو کاپی بھی قابل قبول ہوگی۔ کاشتکار درخواستیں اپنے ضلع کے متعلقہ ڈپٹی ڈائریکٹر زراعت (توسیع) کے دفتر میں 15نومبر 2023 تک جمع کروائیں۔ یاد رہے، اس مقابلہ کے لئے اراکین قومی و صوبائی اسمبلی، سینیٹرز، ان کے فیملی ممبرز اور گریڈ 17 اور اوپر کے سرکاری ملازمین درخواست دینے کے اہل نہ ہوں گے۔ ان کے علاوہ ترقی پسند کسان جو ضلعی یا ڈویژنل کمیٹی کے ارکان مقرر ہوں وہ بھی مقابلہ کیلئے اہل نہ ہوں گے۔ پیداواری مقابلہ میں صوبائی سطح پر بھی منعقد ہوگا اور صوبائی کمیٹی کا فیصلہ حتمی ہوگا۔ جیتنے والے کاشتکار کیلئے لاکھوں روپے کے نقدانعامات دئیے جائیں گے۔