بھارت میں بھینس نے ڈیڑھ لاکھ مالیت کا منگل سوترنگل لیا

جمعرات 5 اکتوبر 2023 22:52

نئی دہلی (اُردو پوائنٹ اخبارتازہ ترین - آن لائن۔ 05 اکتوبر2023ء) بھارتی ریاست مہاراشٹر میں ایک بھینس نے غلطی سے ایک مہنگا سونے کا منگل سوتر نگل لیا جسے 2 گھنٹے کی طویل سرجری کے بعد نکال لیا گیا۔ غیر ملکی خبر رساں ادار کے مطابق مہاراشٹر کے ضلع واشیم میں ایک بھینس نے غلطی سے مہنگا سونے کا منگل سوتر’ نگل لیا۔ منگل سوترکی تخمینہ قیمت تقریباً 1.5 لاکھ روپے ہے جس کا وزن 20 گرام سے زیادہ ہے۔

یہ واقعہ اس وقت پیش آیا جب ایک خاتون نے زیورات کو سویا بین اور مونگ پھلی کے چھلکوں سے بھری پلیٹ میں نہانے سے پہلے رکھا۔ نہانے کے بعد اس نے چھلکوں والی پلیٹ بھینس کے سامنے کھانے کے لیے رکھ دی اور گھر کے کام میں مشغول ہوگئی۔ چند گھنٹوں کے بعد ہی اسے احساس ہوا کہ زیورات غائب ہیں۔

(جاری ہے)

اسے یاد آیا کہ اس نے چارے کی پلیٹ میں ‘منگل سوتر’ رکھا تھا۔

تاہم جب اس نے دیکھا تو بھینس چارہ کھا چکی تھی اور ساتھ ساتھ منگل سوتر بھی نگلی گئی تھی۔ خاتون نے فوری طور پر اپنے شوہر کو واقعے کی اطلاع دی جس کے بعد جانوروں کے ایک ڈاکٹر سے رابطہ کیا گیا۔ ڈاکٹر نے میٹل ڈیٹیکٹر کا استعمال کیا اور تصدیق کی کہ ‘ منگل سوتر’ بھینس کے پیٹ میں ہے۔اگلے دن بھینس کی دو گھنٹے طویل سرجری کی گئی اور اس کے پیٹ سے زیور کو کامیابی سے نکال لیا گیا۔ سرجری کے بعد بھینس کے 60 سے 65 ٹانکے لگے۔واشیم کے ایک ہیلتھ افسر بالا نے میڈیا نمائندوں کو بتایاکہ میٹل ڈیٹیکٹر سے پتہ چلا کہ بھینس کے پیٹ میں کچھ دھات نما شے ہے۔ آپریشن 2 گھنٹے تک جاری رہا جس میں 60-65 ٹانکے درکار تھے۔