بھارت،ڈانٹ پڑنے پر بچی نے والد برائے فروخت کا اشتہار لگا دیا

قیمت 2 لاکھ روپے، مزید معلومات کے لیے گھنٹی بجائیں،بچی کا سوشل میڈیا پر اشتہار

جمعہ 6 اکتوبر 2023 14:24

بھارت،ڈانٹ پڑنے پر بچی نے والد برائے فروخت کا اشتہار لگا دیا

نئی دہلی(اُردو پوائنٹ اخبارتازہ ترین - این این آئی۔ 06 اکتوبر2023ء) والدین کی بچوں سے تکرار اور ڈانٹ ڈپٹ معمول کی بات ہے لیکن ایک بچی نے ڈانٹ پڑنے کے بعد غیرمعمولی ردعمل دیا۔بھارتی ٹی وی کے مطابق بھارت میں ایک 8 سالہ بچی اور اس کے والد کے درمیان معمولی تکرار ہوئی جس کیبعد بچی نے اپنے گھر کے دروازے پر والد برائے فروخت کا اشتہار لگا دیا۔بچی نے ہاتھ سے لکھے اشتہار میں کہا کہ والد برائے فروخت، قیمت 2 لاکھ روپے مزید معلومات کے لیے گھنٹی بجائیں۔

(جاری ہے)

بچی کے والد میلن کو ہولک نے اپنے سوشل میڈیا پر اشتہار کی تصویر لگاتے ہوئے لکھا کہ معمولی جھگڑے کے بعد اشتہار دیکھنے کے بعد مجھے لگا کہ میں اپنی بیٹی کے لیے کافی نہیں ہوں۔سوشل میڈیا پر اشتہار کی ویڈیو وائرل ہوگئی۔ کچھ صارفین نے بچی کے ردعمل کو دلچسپ اور عام ڈگر سے ہٹ کر قرار دیا۔ایک صارف نے کہا میری بچیاں تو شاید میری قیمت صرف 20 ہزار ہی لگائیں۔ کچھ صارفین کا موقف تھا کہ ایسا نہیں کرنا چاہیے تھا۔ایک صارف نے بچی کی لکھائی کی تعریف کرتے ہوئے کہ پہلے خوبصورت لکھائی عام بات ہوا کرتی تھی لیکن اب یہ چیز تقریبا ختم ہوگئی ہے۔