طلباو طالبات کی ووٹرز آگاہی مہم کے سلسلے میں بیوٹمز میں تربیتی ورکشاپ کا انعقاد

بدھ 8 نومبر 2023 18:53

کوئٹہ(اُردو پوائنٹ اخبارتازہ ترین - این این آئی۔ 08 نومبر2023ء) نوجوانوں کو انتخابی عمل میں شامل کرنے کے لئے پلڈاٹ اور یو این ڈی پی کے زیر اہتمام بیوٹمز یونیورسٹی کوئٹہ میں طلبہ میں ووٹ کی تعلیم اور آگاہی بیدار کرنے کیلئے ورکشاپ کا انعقاد کیا گیا۔ یونیورسٹی کے طلباء و طالبات کی کثیر تعداد نے ووٹر آگاہی مہم میں شرکت کی۔ اس موقع پر بیوٹمز یونیورسٹی کے پرو وائس چانسلر عبدالرحمان، ڈسٹرکٹ الیکشن کمشنر کوئٹہ نذیر احمد، پلڈاٹ کے فہیم احمد اور الیکشن کمیشن کے عملے سمیت بیوٹمز کے فیکلٹی ممبران بھی موجود تھے۔

ورکشاپ کا آغاز تلاوت قرآن مجید سے ہوا۔ پروائس چانسلر بیوٹمز یونیورسٹی عبدالرحمان نے ابتدائی کلمات میں الیکشن کمیشن کے انتخابی اقدامات کو سراہا۔

(جاری ہے)

انہوں نے کمیشن کا شکریہ ادا کرتے ہوئے کہا کہ اس طرح کے اگاہی ورکشاپ سے نوجوانوں بالخصوص خواتین طلبہ میں ووٹ کی افادیت اجاگر ہوگی اس موقع پر ڈسٹرکٹ الیکشن کمشنر کوئٹہ سید نزیر احمد نے بھی شرکاء سے خطاب کیا ڈسٹرکٹ الیکشن کمشنر کوئٹہ سید نذیر احمد نے ووٹ کی اہمیت کے حوالے سے طلبہ و طالبات کو آگاہ کیا اور انتخابی امور،نوجوانوں کی انتخابی عمل میں شمولیت پر زور دیا۔

ورکشاپ میں آئندہ عام انتخابات میں ووٹرز بالخصوص خواتین کے ٹرن آوٹ میں اضافہ کے لِئے ان کی ذمہ داریوں کے بارے میں آگاہی دی گئی۔ طلباء و طالبات کو الیکشن کے حوالے سے سوالات و جوابات کا سیشن بھی منعقد کیا گیاجس میں طلباء و طالبات نے پینل کے ممبران سے سوالات کیے جس کے جوابات پینل کے ممبران نے بھر پور انداز میں دیے۔ پینل کے ممبران نے شرکاء پر زور دیتے ہوئے کہا کہ وہ آئندہ عام انتخابات میں ووٹ دے کر اپنا قومی فریضہ ادا کریں۔

سیشن کے شرکا سے الیکشن کمیشن کے اسسٹنٹ ڈائریکٹر ایم سی او غوث بخش اور یو این ڈی پی کے نمائندہ آمنہ نے بھی خطاب کیا اور انتخابی عمل میں نوجوانوں کی شرکت کی اہمیت پہ روشنی ڈالی۔ سیشن کے آخر میں ڈسٹرکٹ الیکشن کمشنر کوئٹہ سید نذیر احمد اور ان کے عملے نے پولنگ اسٹیشن پر ایک فرضی پولنگ کے مشق کا بھی اہتمام کیا تاکہ طلباء کو ووٹنگ کے عمل سے واقف کرایا جا سکے۔ طلباء نے سیشن اور موک پول ایکسرسائز میں مختلف سوالات کر کے تمام طلبا و طلبات نے پولنگ کے طریقہ کار کو سمجھنے میں دلچسپی لی۔