جوبائیڈن نے پاکستانی کو امریکی وفاقی اپیل کورٹ کا پہلا مسلم وکیل نامزد کردیا

جمعرات 16 نومبر 2023 18:05

واشنگٹن(اُردو پوائنٹ اخبارتازہ ترین - این این آئی۔ 16 نومبر2023ء) امریکی صدر جوبائیڈن نے کراچی سے تعلق رکھنے والے عدیل منگی کو وفاقی اپیل کورٹ میں وکیل نامزد کردیا اس طرح وہ اس عہدے پر پہنچنے والے پہلے امریکی مسلمان بن جائیں گے۔ امریکی میڈیا کے مطابق صدر جوبائیڈن کی جانب سے عدیل منگی کی بطور وفاقی اپیل کورٹ وکیل نامزدگی کی منظوری سینیٹ نے دینی ہوگی جس میں حکمراں جماعت کی اکثریت ہونے کے سبب یہ مرحلہ بھی بآسانی طے ہوجائے گا۔

پاکستانی نژاد عدیل منگی کو امریکی صدر نے فلاڈیلفیا میں 3rd سرکٹ کے لیے امریکی عدالت برائے اپیل کے لیے نامزد کیا گیا اور ان کے ساتھ دیگر 7 عدالتی نامزدگیاں بھی کی گئیں۔اعلی تعلیم یافتہ عدیل منگی ہارورڈ لا اسکول اور آکسفورڈ سے فارغ التحصیل ہیں۔

(جاری ہے)

ٹرمپ دور میں مذہبی آزادی کے مقدمات کی سرگرمی سے پیروی کرتے رہے ہیں اور اِس وقت قانونی فرم پیٹرسن بیلکنپ ویب اینڈ ٹائلر ایل ایل پی میں پارٹنر بھی ہیں۔

علاوہ ازیں عدیل منگی نیویارک کی مسلم بار ایسوسی ایشن، نیویارک کی لیگل ایڈ سوسائٹی اور مسلمز فار پروگریسو ویلیوز کے ساتھ بھی کام کر چکے ہیں۔پاکستانی نژاد وکیل لنکنز ان کی معزز سوسائٹی کے رکن ہونے کے ساتھ ساتھ الائنس آف فیملیز فار جسٹس کے ایڈوائزری بورڈ کے رکن بھی ہیں۔خیال رہے کہ دو سال قبل جوبائیڈن نے وفاقی ضلعی عدالت میں بھی پہلے مسلم زاہد قریشی کو نامزد کیا تھا وہ بھی پاکستانی نژاد ہیں اور وفاق کی ضلعی عدالت میں فرائض انجام دے رہے ہیں۔