شاہین آفریدی کو ٹی ٹونٹی ٹیم کی قیادت ملتے ہی کپتانی چھوڑنے کا مشورہ مل گیا

شاہین ، شاہد آفریدی کے داماد ہیں، وہ کپتان برقرار رہے تو شاہد کا نام آئیگا ،الزامات لگائے جائیںگے، میں شاہد کو بھی یہی مشورہ دوںگا کہ وہ شاہین کو قیادت چھوڑنے پر قائل کرے: باسط علی

ذیشان مہتاب جمعہ 17 نومبر 2023 14:22

شاہین آفریدی کو ٹی ٹونٹی ٹیم کی قیادت ملتے ہی کپتانی چھوڑنے کا مشورہ ..

لاہور (اردو پوائنٹ تازہ ترین اخبار ۔ 17 نومبر 2023ء ) سٹار پیسر شاہین شاہ آفریدی کو پی سی بی نے بدھ کے روز ٹی 20 فارمیٹ کے لیے نیا کپتان نامزد کیا لیکن میدان میں اترنے سے قبل ہی انہیں قیادت چھوڑنے کا مشورہ بھی مل گیا۔ ورلڈ کپ میں پاکستان کرکٹ ٹیم کی بدترین کارکردگی کے بعد ٹیم میں کئی تبدیلیاں کر دی گئیں۔ بابر اعظم کے تینوں فارمیٹس کی قیادت چھوڑنے کے بعد پی سی بی نے ٹی ٹونٹی فارمیٹ کے لیے فاسٹ بولر شاہین شاہ آفریدی کو نیا کپتان نامزد کیا ہے۔

شاہین آفریدی کی قیادت میں قومی ٹیم آئندہ 6 ماہ میں نیوزی لینڈ، آئرلینڈ، انگلینڈ، نیدر لینڈ کے خلاف 19 ٹی ٹونٹی میچز کھیلے گی تاہم اصل امتحان آئندہ سال جون میں ویسٹ انڈیز اور امریکا میں ہونے والا آئی سی سی ٹی 20 ورلڈ کپ ہوگا۔

(جاری ہے)

ابھی شاہین آفریدی کو نیا کپتان بننے کے بعد اپنی قیادت کے جوہر دکھانے کے لیے میدان میں اترنے کا موقع بھی نہیں ملا تھا کہ پیسر کو کپتانی چھوڑنے کا مشورہ دے دیا گیا ہے۔

سابق ٹیسٹ کرکٹر باسط علی نے نجی ٹی وی ’اے آر وائی نیوز‘ کے سپورٹس پروگرام میں گفتگو کرتے ہوئے کہا کہ شاہین آفریدی کو کپتانی چھوڑ کر اسے محمد رضوان کے سپرد کر دینا چاہیے۔ باسط علی نے اپنے مشورے کی توجیح پیش کرتے ہوئے کہا کہ شاہین ، شاہد آفریدی کے داماد ہیں، وہ کپتان برقرار رہتے ہیں تو پھر شاہد آفریدی کا نام آئے گا اور الزامات لگائے جائیں گے۔

میں شاہد آفریدی کو بھی یہی مشورہ دوں گا کہ وہ شاہین کو قیادت چھوڑنے پر قائل کرے اور ٹی ٹونٹی ٹیم کی قیادت محمد رضوان کو دیدی جائے۔ پروگرام میں شریک سابق ٹیسٹ کپتان اظہر علی نے کہا کہ یہ غلط ہے کہ پلیئر کی مینجمنٹ سے رشتے داری نکل آئے تو فرض کرلیتے ہیں کہ اسے ٹیم میں رشتے دار کی وجہ سے لیا گیا، ہمیں رشتے داریوں کو نہیں کھلاڑی کی کارکردگی کو دیکھنا چاہیے۔