صوبائی وزیر تعلیم منصور قادر کی خورشید آباد آمد، سکول میں جھلسنے والے پانچ سالہ طالبعلم کی عیادت کی

پیر 20 نومبر 2023 23:50

لاہور (اُردو پوائنٹ اخبارتازہ ترین - اے پی پی۔ 20 نومبر2023ء) تحصیل خانپور کے نواحی قصبہ خورشید آباد کے پرائمری سکول میں پانچ سالہ طالبعلم کے جھلسنے کا واقع، وزیر اعلی پنجاب کی ہدایت پر نگراں وزیر تعلیم پنجاب منصور قادر خانپور پہنچ گئے۔وزیر تعلیم پنجاب نے گورنمنٹ پرائمری سکول خورشید آباد کا دورہ کیا اور اساتذہ اور اہل علاقہ سے ملاقات کی۔

وزیر تعلیم سکول میں جھلسنے والے پانچ سالہ طالبعلم عبدالہادی کی عیادت کیلئے اس کے گھر گئے اور ورثا سے ملاقات کی۔

(جاری ہے)

اس موقع پر گفتگو کرتے ہوئے صوبائی وزیر نے کہا کہ وزیر اعلی پنجاب نے سکول میں طالبعلم کے جھلسنے کا سخت نوٹس لیا ہے۔ وزیر اعلی پنجاب کی ہدایت پر میں آپ کی عیادت کے لیے حاضر ہوا ہوں۔ سکول میں آگ لگانے اور طالبعلم کے جھلسنے کی مکمل اور شفاف انکوائری کرائی جائے گی۔

وزیر اعلی پنجاب کی ہدایت پر اعلی تحقیقاتی ٹیم سکول پہنچ رہی ہے۔ تحقیقاتی ٹیم کی رپورٹ پر ذمہ داران کے خلاف سخت محکمانہ کارروائی کی جائے گی۔انہوں نے ہدایت کی کہ متاثرہ طالبعلم کو بہترین طبی سہولیات کی فراہمی یقینی بنائی جائے اور ڈپٹی کمشنر متاثرہ بچے کے علاج معالجہ کو براہِ راست مانیٹر کریں جبکہ طالب علم کو ہسپتال منتقل کرتے ہوئے ورثا کو بھی سہولیات فراہم کریں۔