پاکستان کی پہلی خاتون فائٹر پائلٹ مریم مختیار کی 8ویں برسی جمعے کو منائی گئی

جمعہ 24 نومبر 2023 14:29

لاہور (اُردو پوائنٹ اخبارتازہ ترین - اے پی پی۔ 24 نومبر2023ء) پاکستان کی پہلی خاتون فائٹر پائلٹ مریم مختیار کی 8ویں برسی24 نومبر بروز جمعہ منائی گئی۔تفصیلات کے مطابق مریم مختیار 18 مئی 1992 کو کراچی میں پیدا ہوئیں، انہوں نے انٹرمیڈیٹ کا امتحان آرمی پبلک سکول و کالج ملیر کینٹ سے پاس کیا۔

(جاری ہے)

مریم نے فٹبال کی بہترین کھلاڑی ہونے کی وجہ سے نیشنل ویمن فٹبال چیمپئن شپ میں بلوچستان یونائیٹڈ کی نمائندگی بھی کی،2014 میں مریم مختیار پاکستان ایئرفورس میں بطور گریجویٹ شامل ہوئیں، ان کا تعلق پی اے ایف کے 132 ویں جی ڈی پائلٹ کورس سے تھا جس میں 6 دیگر خواتین بھی شامل تھیں۔

ان کا شمار پاک فضائیہ کے جنگجو پائلٹس میں ہوتا تھا،24 نومبر 2015 کو تربیتی طیارے پر معمول کی پرواز کے دوران میانوالی کے قریب جہاز میں فنی خرابی ہوئی تو بہادر مریم نے جہاز کا رخ غیر آباد علاقے کی طرف موڑ لیا مگر زندگی نے مہلت نہ دی اور انہوں نے دوران ڈیوٹی شہید ہونے والی پاک فضائیہ کی پہلی فائٹر پائلٹ کا اعزاز حاصل کیا۔پاک وطن کی دلیر بیٹی نے جان کی قربانی دے کر جرات و بہادری کی تاریخ رقم کی، انہیں تمغہ شجاعت سے نوازا گیا۔شہید پائلٹ مریم مختیار کراچی ملیر کینٹ کے قبرستان میں سپرد خاک ہوئیں۔