Live Updates

’پارٹی فوج مخالف عناصر سے دوری اختیار کرے‘ عمران خان کی ہدایت

سوشل میڈیا پر موجود ایسے افراد سے لاتعلقی اختیار کی جائے جو فوج کو ہدف بنا رہے ہیں اور پی ٹی آئی و فوج کے درمیان تعلقات کو خراب کرنے کی کوشش کر رہے ہیں۔ چیئرمین پی ٹی آئی کا پیغام

ساجد علی منگل 28 نومبر 2023 11:03

’پارٹی فوج مخالف عناصر سے دوری اختیار کرے‘ عمران خان کی ہدایت

اسلام آباد ( اُردو پوائنٹ اخبارتازہ ترین ۔ 28 نومبر 2023ء ) پاکستان تحریک انصاف کے چیئرمین عمران خان نے پارٹی کو فوج مخالف عناصر سے دوری اختیار کرنے کی ہدایت کردی۔ صحافی انصارعباسی نے رپورٹ کیا ہے کہ جیل میں قید چیئرمین پی ٹی آئی عمران خان نے اپنی پارٹی قیادت کو ہدایت کی ہے کہ ایسے تمام عناصر سے دور رہیں جو پی ٹی آئی اور فوج کے درمیان تعلقات کو خراب کرنے کی کوشش کر رہے ہیں، پارٹی کے اندر یا باہر موجود ایسے عناصر کی مذمت کی جائے۔

انگریزی روزنامہ دی نیوز نے پی ٹی آئی کے سینئر نائب صدر شیر افضل خان مروت کا حوالہ دیتے ہوئے بتایا ہے کہ انہیں عمران خان نے ہدایت کی ہے کہ پارٹی اور سوشل میڈیا پر موجود ایسے افراد سے لاتعلقی اختیار کی جائے جو فوج کو ہدف بنا رہے ہیں، اسے بدنام کر رہے ہیں یا پھر فوج کے خلاف نفرت پھیلا رہے ہیں، یہ تاثر دور کیا جائے کہ پی ٹی آئی فوج کے خلاف ہے، میرے حامی اور سوشل میڈیا پر موجود کارکن فوج مخالف بیانیہ اختیار نہ کریں۔

(جاری ہے)

اس حوالے سے کہا گیا ہے کہ عمران خان نے ملک اور قوم کیلئے قربانیاں دینے والے مسلح افواج کے شہداء کو خراج تحسین پیش کیا ہے اور چیئرمین پی ٹی آئی ہمیشہ سے سمجھتے ہیں کہ فوج ملک کی سلامتی اور دفاع کے لیے انتہائی اہم ہے، عمران خان نے شہید نوجوان افسران اور فوجیوں کے اہل خانہ کے ساتھ ہمدردی کا اظہار کیا اور یقین دہانی کرائی ہے کہ پی ٹی آئی ہمیشہ ان کے ساتھ کھڑی رہے گی، شہداء قوم کا فخر ہیں۔

شیر افضل خان مروت نے کہا ہے کہ میں نے خیبرپختونخوا میں تحریک انصاف کے بڑے اجتماعات سے خطاب کیا، ان عوامی اجتماعات میں پاک فوج زندہ باد کے نعرے لگائے گئے، مسلح افواج کے شہداء کو خراج تحسین بھی پیش کیا گیا، پی ٹی آئی کے نام نہاد ہمدردوں اور ایسے وی لاگرز جنہوں نے فوج کے خلاف زہر افشانی کی ان کا پی ٹی آئی سے کوئی تعلق نہیں، ہم ایسے کرداروں کی مذمت کرتے ہیں اور خود کو ان سے دور رکھتے ہیں، اگر پاک فوج کو بدنام کرنے والے عناصر پی ٹی آئی کے سوشل میڈیا میں ہیں تو پارٹی ان سے لاتعلقی کا اظہار کرے گی۔