وزارت مذہبی امور نے آئندہ حج آپریشن کیلئے درکار ڈالرز کا تخمینہ لگا لیا،280 ملین ڈالرز درکار ہونگے

بدھ 29 نومبر 2023 23:19

لاہور(اُردو پوائنٹ اخبارتازہ ترین - این این آئی۔ 29 نومبر2023ء) وزارت مذہبی امور نے آئندہ حج آپریشن کیلئے درکار ڈالرز کا تخمینہ لگا لیا،سرکاری حج اسکیم کے لئے 280 ملین ڈالرز درکار ہوں گے،وزارت مذہبی امور نے 180 ملین ڈالرز کی ضرورت سے وزارت خزانہ کو آگاہ کر دیا۔ذرائع کے مطابق ڈالرز کے حصول کے لئے اسپانسر شپ اسکیم کا کوٹہ 10 ہزار سے بڑھا کر 25 ہزار کر دیا گیا، 100 ملین ڈالرز اسپانسر شپ اسکیم کے تحت حاصل کیے جائیں گے۔

(جاری ہے)

اسپانسرشپ اسکیم میں شمولیت کے لئے درخواست گزار کا پاکستانی پاسپورٹ لازمی ہو گا، اسپانسر شپ اسکیم میں حج اخراجات کی رقم ڈالرز میں وصول کی جائے گی، دنیا بھر میں مقیم پاکستانی اور ان کے رشتہ داراس اسکیم کے تحت حج کرسکیں گے۔ اسپانسر شپ اسکیم کے درخواست دہندہ قرعہ اندازی سے مستثنیٰ ہوں گے۔وزارت مذہبی امور کے مطابق لانگ حج پیکج جنوبی ریجن والوں کو 3 ہزار 775 ڈالرز ادا کرنا ہوں گے۔ لانگ حج پیکج شمالی ریجن والوں کو 3ہزار 800ڈالرز ادا کرنا ہوں گے۔ کم مدت حج پیکج جنوبی ریجن والوں کو 4ہزار 15ڈالرز جبکہ کم مدت حج پیکج شمالی ریجن والوں کو 4ہزار 50ڈالرز ادا کرناہوں گے۔