اسلام آباد چیمبر میں ممتاز بزنس لیڈر ایس ایم منیر مرحوم کی پہلی برسی پر تعزیتی ریفرنس کا انعقاد

اسلام آباد (اُردو پوائنٹ اخبارتازہ ترین - اے پی پی۔ 30 نومبر2023ء) اسلام آباد چیمبر آف کامرس اینڈ انڈسٹری میں ملک کے ممتاز بزنس لیڈر،ایف پی سی سی آئی کے سابق صدر، ٹریڈ ڈویلپمنٹ اتھارٹی آف پاکستان کے سابق چیف ایگزیکٹو اور یونائیٹڈ بزنس گروپ کے سابق سرپرست اعلیٰ ایس ایم منیر مرحوم کی پہلی برسی کے موقع پرایک تعزیتی ریفرنس منعقد کیا گیا جس میں شہر کے تاجروں و صنعتکاروں کی کثیر تعداد نے شرکت کی اور ایس ایم منیر کی بزنس کمیونٹی کیلئے خدمات کو خراج عقیدت پیش کیا۔

ایس ایم منیر مرحوم کے بیٹے اور پنجاب کے وزیر صنعت و تجارت ایس ایم تنویر نے اپنے ٹیلیفونک خطاب میں تعزیتی ریفرنس منعقد کرنے پر اسلام آباد چیمبر کے صدر احسن ظفر بختاوری اور ان کی ٹیم کا شکریہ ادا کیا۔

(جاری ہے)

انہوں نے کہا کہ ایس ایم منیر مرحوم نے اپنی زندگی ملک کی بزنس کمیونٹی کی خدمت کیلئے وقف کر رکھی تھی اور ہمیشہ ان کے کاروباری مفادات کے فروغ کیلئے جدوجہد کرتے رہے۔

انہوں نے کہا کہ ایس ایم منیر مرحوم کی زندگی تاجروں وصنعتکاروں کیلئے ایک مشعل راہ ہے اور بزنس کمیونٹی ان کی خدمات کو ہمیشہ یاد رکھے گی۔ انہوں نے اس عزم کا اظہار کیا کہ ایس ایم منیر مرحوم کی خواہش کے مطابق ان کے مشن کو آگے بڑھاتے ہوئے یوبائیٹڈ بزنس گروپ کے پلیٹ فارم سے بزنس کمیونٹی کی خدمت جاری رکھیں گے۔اسلام آباد چیمبر آف کامرس اینڈ انڈسٹری کے صدر احسن ظفر بختاوری نے اپنے خطاب میں کہا کہ ایس ایم منیر مرحوم ملک کی بزنس کمیونٹی کیلئے ایک رول ماڈل تھے اور ان کی ناقابل فراموش خدمات کے اعتراف میں چیمبر کا آڈیٹوریم ان کے نام سے منسوب کریں گے۔

انہوں نے کہا کہ ایس ایم منیرمرحوم سے بہت کچھ سیکھنے کو ملا، انہوں نے ہمیشہ ملک کے تاجروں وصنعتکاروں کی فلاح و بہبود کیلئے کام کیا اور اس مقصد کے حصول کیلئے کسی قربانی سے گریز نہیں کیا۔ انہوں نے کہا کہ ایس ایم منیر مرحوم بزنس کمیونٹی کے مسائل حل کرانے کیلئے ہمیشہ فرنٹ فٹ پر کھیلتے تھے اوربلاتفریق تاجروں وصنعتکاروں کے ساتھ ہمیشہ پیار و محبت سے پیش آتے تھے۔

ایس ایم منیر مرحوم کی محنت اور ایمانداری ہم سے کیلئے ایک روشن مثال ہے اور کاروبار کے میدان میں آگے بڑھنے کیلئے ہمیں ان کے اصولوں کو اپنانا ہو گا۔اسلام آباد چیمبر آف کامرس کے نائب صدر انجینئر اظہر الاسلام ظفر نے اپنے خطاب میں ایس ایم منیر کی بے مثال شخصیت اور بزنس کمیونٹی کیلئے ان کی لازوال خدمات کو خراج تحسین پیش کیا اور اس عزم کا اظہار کیا کہ ہم سب مل کر ایس ایم منیر مرحوم کے مشن کو آگے بڑھا نے میں کردار ادا کریں گے۔

چیمبر کے سابق صدر اور یو بی جی پاکستان کے سیکرٹری جنرل ظفر بختاوری نے اپنے خطاب میں کہا کہ ایس ایم منیر مرحوم ایک قدر آور بزنس لیڈر تھے جن کی بزنس کمیونٹی کیلئے خدمات ہمیشہ سنہری حروف میں لکھی جائیں گی۔ ایس ایم منیر مرحوم کی رحلت سے بزنس کمیونٹی کی لیڈر شپ میں پیدا ہونے والا خلا کبھی پر نہیں ہو سکے گا۔ ایس ایم منیر مرحوم جیسی شخصیات اور ہیروز کو معاشرے کیلئے رول ماڈل بنانا ہو گا۔

ان کا سب سے بڑا کارنامہ یہ ہے کہ انہوں نے اپنے پیروکار پیدا کرنے کی بجائے اس ملک کیلئے بزنس لیڈر ز پیدا کئے۔ انہوں نے اس عزم کا اظہار کیا کہ ایس ایم منیر مرحوم کے نقش قدم پر چلتے ہوئے ملک و قوم کی ترقی و خوشحالی کیلئے کام کرتے رہیں گے۔ایف پی سی سی آئی کیلئے یو بی جی کے صدارتی امیدوار عاطف اکرام شیخ نے کہا کہ ایس ایم منیر مرحوم کی خدمات کا سفر جاری رکھیں گے۔

انہوں نے کہا کہ یو بی جی کو دوبارہ اقتدار میں لا کر بزنس کمیونٹی کی بہتری کیلئے ایس ایم منیر موحوم کے خوابوں کو پورا کرینگے۔اسلام آباد چیمبر آف کامرس اور ایف پی سی سی آئی کے سابق صدر زبیر احمد ملک نے ایس ایم منیر مرحوم کی بزنس کمیونٹی کیلئے گراں قدر خدمات پر روشنی ڈالی اور امید کا اظہار کیا کہ یونائیٹڈ بزنس گروپ ایف پی سی سی آئی کے آئندہ الیکشن میں شاندار کامیابی حاصل کر کے ایس ایم منیر مرحوم کے مشن کو مزید آگے بڑھائے گا۔

اسلام آباد چیمبر آف کامرس کے سابق صدر محمد اعجاز عباسی، ایف پی سی سی آئی کے سابق نائب صدر کریم عزیز ملک اور یو بی جی کے چیف کوآرڈینٹر ملک سہیل حسین سمیت دیگر نے بھی اپنے خیالات کا اظہار کیا اور ملک کی بزنس کمیونٹی کیلئے ایس ایم منیر مرحوم کی شاندار خدمات کو خراج عقیدت پیش کیا۔