کاشتکاروں کوٹماٹر کی کاشت کیلئے اچھے نکاس والی زرخیز میرا زمین کے انتخاب کی سفارش

جمعہ 1 دسمبر 2023 12:53

فیصل آباد (اُردو پوائنٹ اخبارتازہ ترین - اے پی پی۔ 01 دسمبر2023ء) ریسرچ انفارمیشن یونٹ آری فیصل آباد کی جانب سے کاشتکار وں کو ٹنل میں ٹماٹر کی کاشت کیلئے تیار کی گئی اکتوبر کاشتہ نرسری فوری طور پر ٹنل میں منتقل کرنے کی ہدایت کی گئی ہے اور کہاگیاہے کہ کاشتکار اچھے نکاس والی زرخیز میرا زمین جس میں نامیاتی مادوں کی پوری تعداد موجود اور نمی دیر تک برقرار رکھنے کی صلاحیت ہو کا چناؤ کریں تاکہ ٹماٹر کی اچھی پیداوار حاصل ہو سکے۔

(جاری ہے)

آری کے ترجمان نے کہا کہ ٹماٹر کے پودے کو مختلف مراحل میں مختلف درجہ حرارت کی ضرورت ہوتی ہے۔ انہوں نے بتایاکہ جب پودا اگاؤ کی حالت میں ہو تو اس کیلئے موزوں ترین درجہ حرارت 16سے29 ڈگری سینٹی گریڈ، بڑھوتری کے موقع پر21 سے24 ڈگری سینٹی گریڈ، پھل بنتے وقت رات کو 14سے17 اور دن کے وقت 14 سے 19 ڈگری سینٹی گریڈ ہونا چاہیے۔ انہوں نے بتایاکہ ٹماٹرکا رنگ سرخ ہونے پر درجہ حرارت 20 سے24 ڈگری سینٹی گریڈ ہونا بھی ضروری ہے کیونکہ اس سے کم یازیادہ درجہ حرارت کی صورت میں ٹماٹر کاپھل متاثر ہوسکتاہے۔