شرح سود کم کرنے کا وقت آ گیا ہے،بروقت الیکشن ضروری ہیں،میاں زاہد حسین

ملکی معیشت زمین بوس ہونے کے بعد اب بہتری کی جانب گامزن ہے،صدر کراچی انڈسٹریل الائنس

جمعہ 1 دسمبر 2023 17:41

شرح سود کم کرنے کا وقت آ گیا ہے،بروقت الیکشن ضروری ہیں،میاں زاہد حسین

کراچی (اُردو پوائنٹ اخبارتازہ ترین - این این آئی۔ 01 دسمبر2023ء) نیشنل بزنس گروپ پاکستان کے چیئرمین، پاکستان بزنس مین اینڈ انٹلیکچولزفورم وآل کراچی انڈسٹریل الائنس کے صدراورسابق صوبائی وزیرمیاں زاہد حسین نے کہا ہے کہ ملکی معیشت زمین بوس ہونے کے بعد اب بہتری کی جانب گامزن ہے۔ آئی ایم ایف مطمئن ہے ،مہنگائی عروج پر پہنچنے کے بعد سست روی سے کم ہو رہی ہے، خساروں پر قابو پایا جا چکا ہے، ڈالر کو لگام ڈالی جا چکی ہے اور زرمبادلہ کے ذخائر کی صورتحال بھی تشویشناک نہیں رہی۔

حالات کو مزید بہتر بنانے کے لئے الیکشن ضروری ہو چکے ہیں۔ الیکشن میں تاخیر سے عدم استحکام پیدا ہو گا جس کی پہلی ضرب معیشت پر پڑے گی۔ میاں زاہد حسین نے کاروباری برادری سے بات چیت کرتے ہوئے کہا کہ آثا ر بتا رہے ہیں کہ شرح سود میں جلد کمی کر دی جائے گی جس سے کاروباری برادری کو کچھ ریلیف ملے گا۔

(جاری ہے)

انھوں نے کہا کہ معیشت کے ڈوبتے ہوئے جہاز کو بچانے کا سب سے بڑا کریدٹ آئی ایم ایف کو جاتا ہے کیونکہ اگر وہ قرضہ نہیں دیتا تو ملک دیوالیہ ہو جاتا ۔

قرضے کے بعد سیاسی اور عسکری قیادت نے زمہ داری کا ثبوت دیا جس کا نتیجہ آئی ایم ایف کے اطمینان کی صورت میں نکلا جس سے ساری دنیا میں سرمایہ کاروں اور قرض دہندگان کو مثبت پیغام پہنچا۔اب بروقت اور شفاف الیکشن اور آئی ایم ایف کا ایک اور پروگرام ہمارے قائدین کا ایک اور امتحان ہے جس میں انکی مکمل کامیابی ضروری ہے جو سیاسی و معاشی استحکام کے لئے بہت ضروری ہے۔

میاں زاہد حسین نے مزید کہا کہ آئی ایم ایف کا موجودہ پروگرام ملک کو دیوالیہ ہونے سء بچانے کے لئے ہے اور یہ معیشت کی سمت درست کرنے اور معاشی ترقی کی راہ ہموار کرنے کے لئے ناکافی ہے جس کے لئے دوسرے پروگرام کی ضرورت سے انکار ناممکن ہے۔ماضی میں پاکستانی معیشت کی ایسی مس منیجمنٹ کی گئی ہے کہ آئی ایم ایف کا دوسرا پروگرام بھی اس کے مسائل کم کر سکتا ہے مگر ختم نہیں کر سکتا اور اگر ذمہ دارانہ پالیسیاں جاری رکھی گئیں تو معیشت کو مسائل سے نکالنے میں کم از کم پانچ سال کا عرصہ درکار ہو گا۔ اس دوران اگر معیشت کے بارے میں دوبارہ سیاسی فیصلوں کا دور شروع ہوا اور سستی شہرت کے لئے وسائل بے دریغ لٹائے گئے تو پھر آئی ایم ایف بھی ملک کو بچانے میں ناکام ہو جائے گا۔