Live Updates

پی ایس ایل میں کھلاڑیوں کو توڑنے کیلئے رشوت کا انکشاف

رشوت کے کلچر کو فروغ نہ دیں، اپنی فرنچائزز کیلئے اچھی ٹیم بنانا آپکا حق، اس کیلئے ڈرافٹ میں دستیاب کھلاڑیوں کو منتخب کرنا آپکا حق ہے: ثمین رانا نے سوشل میڈیا پر آواز بلند کردی

ذیشان مہتاب ہفتہ 2 دسمبر 2023 11:49

پی ایس ایل میں کھلاڑیوں کو توڑنے کیلئے رشوت کا انکشاف

لاہور (اردو پوائنٹ تازہ ترین اخبار ۔ 2 دسمبر 2023ء ) پاکستان سپرلیگ میں کھلاڑیوں کو توڑنے کے لیے رشوت کا انکشاف ہواہے۔ پی ایس ایل کی مسلسل 2 بار کی فاتح لاہور قلندرز ٹیم کے چیف آپریٹنگ آفیسر اور ٹیم مینجر ثمین رانا نے سوشل میڈیا پر اس طرز عمل کی کھل کر مخالفت کی ہے۔ پی ایس ایل 9 کے رواں ماہ شیڈول ڈرافٹ سے قبل کھلاڑیوں سے رابطوں کے معاملے پر لاہور قلندرز کے سی او او ثمین رانا نے سوشل میڈیا پر معنی خیز پیغام جاری کردیا ۔

(جاری ہے)

ثمین رانا نے ایکس (سابق ٹویٹر) پر جاری پیغام میں کہا کہ ’اپنی فرنچائزز کے لیے اچھی ٹیم بنانا آپ کا حق ہے، اس کے لیے ڈرافٹ میں دستیاب کھلاڑیوں کو منتخب کرنا آپ کا حق ہے۔ انہوں نے مزید کہا کہ اس کے لیے ممکن ہو تو آپ ٹریڈ بھی کرسکتے ہیں، پی ایس ایل فرنچائزز ایک بڑی فیملی ہیں، ہمیں براہ راست کھلاڑیوں کے پاس نہیں جانا چاہیے۔ ثمین رانا نے کہا کہ موجودہ فرنچائز چھوڑنے کے لیے کھلاڑیوں کو پیسے دینے شروع نہیں کردینے چاہئیں، میری عاجزانہ درخواست ہے کہ رشوت کے کلچر کو فروغ نہ دیں‘‘۔

ٹوئٹ کے آخر میں ثمین رانا نے 'سوچنا بھی منع ہے' کا ہیش ٹیگ استعمال کیا، البتہ انہوں نے اپنی ٹوئٹ میں یہ واضح نہیں کیا کہ ان کا اشارہ کس کی طرف ہے۔