شیری مزاری کا نام پی سی ایل سے ایک ہفتہ میں نکالا جائے ،اسلام آباد ہائی کورٹ کا تحریری فیصلہ جاری

ہفتہ 2 دسمبر 2023 21:30

اسلام آبا د(اُردو پوائنٹ اخبارتازہ ترین - آن لائن۔ 02 دسمبر2023ء) اسلام آباد ہائی کورٹ نے سابق وفاقی وزیر ڈاکٹر شیریں مزاری کا نام پی سی ایل سے نکالنے کی درخواست پر تفصیلی فیصلہ جاری کر دیا،ایک ہفتے کے اندر ڈاکٹر شیریں مزاری کا نام پاسپورٹ کنٹرول لسٹ سے نکالنے کا حکم دیدیا،فیصلے میں کہاگیا ہے کہ دوران سماعت بتایا گیا کہ کریمنل کیسز کے تفتیشی افسر کی سفارش پر ڈاکٹر شیریں مزاری کا نام پی سی ایل پر ڈالا گیا ،تفتیشی افسر سے اس بابت ریکارڈ طلب کیا تو پیش نہ کیا جاسکا ،عدالت نے ایڈیشنل اٹارنی جنرل سے استفسار کیا کہ اسلام آباد میں اور کتنے ملزمان کا نام پی سی ایل پر ہے،ایڈیشنل اٹارنی جنرل عدالت کے سوال پر کوئی جواب دینے میں ناکام رہے،20جولائی2023کا فیصل مقبول شیخ کی درخواست پر جاری فیصلہ بھی اسی نوعیت کا ہے ، فیصل مقبول شیخ کیس کے فیصلے کو کہیں چیلنج نہیں کیا گیا،یہ فیصلہ حتمی شکل اختیار کر چکا ہے، عدالت میں سرکاری وکیل نے بتایا کہ ڈاکٹر شیریں مزاری نے گرفتاری کے بعد قانون کے مطابق ضمانت لی،ڈاکٹر شیریں مزاری کو 7میں سے پانچ مقدمات میں ضمانت ملی،2میں ڈسچارج کردیا گیا ،درخواست گزار ڈاکٹر شیریں مزاری کسی مقدمے میں مفرور یا اشتہاری بھی نہیں ،ڈی جی پاسپورٹ اینڈ امیگریشن ایک ہفتے میں نام پی سی ایل سے نکال کر رپوٹ جمع کرائیں ، پٹیشنر کا نام پاسپورٹ کنٹرول لسٹ میں شامل کرنے سے پہلے آگاہ نہیں کیا گیا،پی سی ایل میں نام ڈالنے سے قبل شوکاز نوٹس بھی جاری نہیں کیا گیا، اس اقدام سے فریقین کی بدنیتی ظاہر ہوتی ہے۔