پاکستان سمیت دنیا بھر میں غلامی کے خلاف عالمی دن منایاگیا

دنیا بھر میں موجود غلاموں کی آبادی کا 58 فیصد حصہ دنیا کے 5 ممالک میں رہائش پذیر ہے اور غیر انسانی حالات کا شکار ہے،ماہرین

ہفتہ 2 دسمبر 2023 21:05

کراچی(اُردو پوائنٹ اخبارتازہ ترین - این این آئی۔ 02 دسمبر2023ء) پاکستان سمیت دنیا بھر میں 2دسمبر کو غلامی کے خلاف عالمی دن منایا گیا،اس دن کو منانے کا مقصد جبری مشقت،انسانی اسمگلنگ، جبری شادیوں اور قرض چکانے کے عوض جبری مزدوری جیسے اقدامات کے خلاف شعور پیدا کرنا ہے۔غلامی کا لفظ سنتے ہی ذہن میں کسی پرانے دور کا تصور ابھر آتا ہے، جب انسانوں کو غلام بنا کر قید کیا جاتا اور پھر ان سے جبری مشقت لی جاتی تھی ، لیکن آپ کو یہ جان کر حیرت ہوگی کہ آج اکیسویں صدی میں بھی مختلف شکلوں میں انسانوں کو غلام بنایا جارہا ہے۔

(جاری ہے)

عالمی ادارے دنیا بھر میں جاری انسانی اسمگلنگ، جبری مزدوری، قرض چکانے کے لیے خدمت، جبری شادی اورکاروباری و جنسی استحصال کو جدید غلامی قرار دیتے ہیں۔ انٹرنیشنل لیبر آرگنائزیشن کے مطابق 2021 میں دنیا بھر میں ایسے افراد کی تعداد کا تخمینہ 5 کروڑ لگایا تھا جو غلامی میں زندگی بسر کررہے ہیں ۔ماہرین کے مطابق دنیا بھر میں موجود غلاموں کی آبادی کا 58 فیصد حصہ دنیا کے 5 ممالک میں رہائش پذیر ہے اور غیر انسانی حالات کا شکار ہے۔ بھارت میں ایک کروڑ سے زائد، چین میں 33 لاکھ، پاکستان میں 21 لاکھ، بنگلا دیش میں 15 لاکھ جب کہ ازبکستان میں 12 لاکھ افراد غلامی کی زنجیروں میں جکڑے ہوئے ہیں۔