جامعہ کراچی، 1517 نشستوں پر داخلوں کے لئے داخلہ ٹیسٹ میں 8ہزار 98 امیدواروں کی شرکت

اتوار 3 دسمبر 2023 23:40

کراچی (اُردو پوائنٹ اخبارتازہ ترین - اے پی پی۔ 03 دسمبر2023ء) جامعہ کراچی میں بی ای،بی ایس،بی ایڈ(آنرز)،بی ایس ان اسپورٹس بزنس مینجمنٹ(مارننگ پروگرام)اورڈاکٹر آف فارمیسی(مارننگ وایوننگ) پروگرام داخلے برائے سال 2024 ء کے لئے داخلہ ٹیسٹ اتوار3 کو صبح 11 بجے جامعہ کراچی کے مختلف شعبہ جات میں قائم 22 امتحانی مراکزمیں منعقد ہوا۔ تفصیلات کے مطابق24 شعبہ جات کی 1517 نشستوں پر داخلوں کے لئے 9044 داخلہ فارم جمع کرائے گئے جبکہ 8098 امیدواروں نے داخلہ ٹیسٹ میں شرکت کی۔

داخلہ ٹیسٹ کے نتائج جامعہ کراچی کی ویب سائٹ اور امیدواروں کے پورٹل پر7 دسمبر تک اَپ لوڈ کردیئے جائیں گے۔دریں اثناء جامعہ کراچی کے وائس چانسلرپروفیسرڈاکٹر خالد محمودعراقی نے رجسٹرارجامعہ کراچی پروفیسر ڈاکٹر عبدالوحید، کراچی یونیورسٹی اسسمنٹ اینڈ ٹیسٹنگ سروس(کے یواے ٹی ایس) کی ممبر پروفیسر ڈاکٹر انیلا امبر ملک،انچارج ڈائریکٹوریٹ آف ایڈمیشنزجامعہ کراچی ڈاکٹر صائمہ اختر،رئیسہ کلیہ فنون وسماجی علوم پروفیسر ڈاکٹرشائستہ تبسم،مشیر امورطلبہ ڈاکٹرنوشین رضا،کیمپس سیکیورٹی ایڈوائزرڈاکٹر سلمان زبیر، سینئر میڈیکل آفیسر جامعہ کراچی ڈاکٹر وفاالطاف اورکراچی یونیورسٹی کے کنسلٹنٹ ڈاکٹر اکمل وحید اوردیگر کے ہمراہ مختلف امتحانی مراکز کا دورہ کیا اورانتظامات پر اطمینان کا اظہارکیا۔

(جاری ہے)

علاوہ ازیں طلباوطالبات اور ان کے والدین کی سہولت کے پیش نظر جامعہ کراچی کے تمام داخلی دروازوں پر پوائنٹس(بسوں) کی موجودگی کو یقینی بنایا گیا تھا جو طلبہ کو امتحانی مراکز تک پہنچانے اور واپس گیٹس تک لے کرجانے کی سہولت فراہم کرتے رہے۔ داخلہ ٹیسٹ میں شرکت کرنے والے امیدواروں اور ان کے والدین کی رہنمائی کے لئے جامعہ کے مختلف مقامات پر ہیلپ ڈیسک کی موجودگی کے ساتھ ساتھ (واچ اینڈوارڈ) کے عملے کو داخلی راستوں اور فیکلٹی کے اطراف تعینات کیا گیا تھا۔ میڈیکل افسراور ان کا طبی عملہ بمعہ ایمبولینس موجود تھا۔شیخ الجامعہ نے داخلہ ٹیسٹ کے کامیاب انعقاد پر تمام اساتذہ،انتظامی عملے اور سیکیورٹی گارڈز کی کاوشوں کو سراہا۔