اماراتی ایئرپورٹس پر مسافروں کی تعداد میں حیران کن اضافہ

ائیرپورٹس پر نومبر 2023کے دوران 6.8 ملین افراد کو سفر کی سہولت فراہم کی،رپورٹ

پیر 4 دسمبر 2023 16:02

اماراتی ایئرپورٹس پر مسافروں کی تعداد میں حیران کن اضافہ

دبئی (اُردو پوائنٹ اخبارتازہ ترین - این این آئی۔ 04 دسمبر2023ء) یو اے ای کے ایئرپورٹس استعمال کرنے والی فضائی کمپنیوں نے بہترین خدمات سر انجام دیتے ہوئے نومبر 2023 کے دوران 6.8 ملین افراد کو سفر کی سہولت فراہم کی۔ آمد و رفت کیلیے 13.6 ملین نشستیں استعمال کی گئیں۔بین الاقوامی خبر رساں ادارے کی رپورٹ کے مطابق او اے جی کا اس حوالے سے کہنا تھا کہ مشرق وسطی میں شیڈولڈ نشستوں میں سے امارات کا حصہ 33 فیصد ہے۔

واضح رہے کہ کورونا وائرس کی وبائل پھیلنے سے قبل 2019 کے نومبر میں 6.3 ملین نشستیں استعمال کی گئی تھیں۔ جبکہ شرح نمو 8 فیصد ریکارڈ کی گئی تھی۔او اے جی کے مطابق نومبر کے دوران متحدہ عرب امارات کا سفر کرنے والوں میں انڈیا سرفہرست رہا۔ استعمال کی جانے والی فضائی نشستوں کی تعداد 1.9 ملین ریکارڈ کی گئی۔

(جاری ہے)

یہ نومبر 2019 میں وبا سے قبل کے ریکارڈ کو عبور کر گئی ہے۔

9.3 فیصد شرح نمو ہے۔ 1.2 ملین نشستوں کے ساتھ سعودی عرب دوسرے نمبر پر ہے۔امارات زبردست شرح نمو ریکارڈ کرنے والی بڑی مارکیٹ بن گیا ہے۔محکمہ شہری ہوابازی کے مطابق 2022 کے مقابلے میں سال رواں کے شروع سے امارات نے غیرمعمولی شرح نمو ریکارڈ کرائی ہے۔محکمہ شہری ہوابازی کو توقع ہے کہ اماراتی ایئرپورٹس سے سفر کرنے والوں کی مجموعی تعداد سال رواں کے آخر تک 130 ملین کی حد عبور کرسکتی ہے۔ابتدائی 8 ماہ کے دوران اماراتی ایئرپورٹس سے سفر کرنے والوں کی تعداد 86.9 ملین تک پہنچ گئی جبکہ گزشتہ سال اسی مدت کے دوران سفر کرنے والوں کی تعداد 62.34 ملین تھی۔