اسرائیلی جارحیت سے غزہ کے 19لاکھ شہری بے گھر ہوچکے ہیں، یو این آر ڈبلیو اے

لوگ ہم سے پوچھتے ہیں ہمیں کہاں تحفظ مل سکتا ہے، مگر ہمارے پاس انہیں بتانے کیلئے کچھ نہیں،تھامس وائٹ

پیر 4 دسمبر 2023 20:20

غزہ (اُردو پوائنٹ اخبارتازہ ترین - این این آئی۔ 04 دسمبر2023ء) اقوام متحدہ کے ادارے یو این آر ڈبلیو اے نے بتایا ہے کہ اسرائیلی جارحیت کے باعث غزہ کے 19لاکھ شہری بے گھر ہوچکے ہیں ،لوگ ہم سے پوچھتے ہیں ہمیں کہاں تحفظ مل سکتا ہے، مگر ہمارے پاس انہیں بتانے کیلئے کچھ بھی نہیں۔ تفصیلات کے مطابق فلسطینی مہاجرین کیلئے کام کرنیوالے اقوام متحدہ کے ادارے یو این آر ڈبلیو اے نے بتایا ہے کہ اسرائیلی جارحیت کے باعث غزہ کی 80 فیصد سے زائد آبادی اپنے گھروں کو چھوڑنے پر مجبور ہو چکی ہے۔

سوشل میڈیا سائٹ ایکس پر ایک بیان میں کہا گیا ہے کہ 7اکتوبر سے جاری اسرائیلی کارروائیوں کے نتیجے میں غزہ کے 19لاکھ افراد بے گھر ہو چکے ہیں۔یو این آر ڈبلیو اے نے بتایا کہ اس وقت 12لاکھ بے گھر افراد ادارے کے 156 مراکز میں مقیم ہیں۔

(جاری ہے)

پوسٹ کے مطابق غزہ میں بڑے پیمانے پر لوگوں کے بے گھر ہونے کا سلسلہ جاری ہے کیونکہ انہیں جنوبی غزہ کے شہر خان یونس سے نکلنے پر مجبور کیا جا رہا ہے۔

عالمی ادارے نے کہا کہ لوگوں کو رفح جانے پر مجبور کیا جا رہا ہے مگر غزہ میں کوئی بھی جگہ محفوظ نہیں۔غزہ میں یو این ڈبلیو آر اے کے ڈائریکٹر تھامس وائٹ نے کہا کہ لوگوں کو رفح جانے پر مجبور کیا جا رہا ہے، مگر وہاں دن بھر لڑاکا طیاروں کی آوازیں گونجتی رہتی ہیں۔انہوں نے کہا کہ لوگ ہم سے پوچھتے ہیں کہ انہیں کہاں تحفظ مل سکتا ہے، مگر ہمارے پاس انہیں بتانے کے لیے کچھ بھی نہیں۔