یوکرین جنگ ، روسی فوج کا ایک اور جنرل ہلاک ہوگیا

میجر جنرل ولادیمیر زاوادسکی روسی آرمی کی 14 ویں کور کے ڈپٹی کمانڈر تھے،رپورٹ

منگل 5 دسمبر 2023 17:27

کیف (اُردو پوائنٹ اخبارتازہ ترین - این این آئی۔ 05 دسمبر2023ء) یوکرین میں جاری جنگ میں روسی فوج کا ایک اور جنرل ہلاک ہوگیا۔برطانوی خبر ایجنسی کے مطابق یوکرین کی سرحد سے متصل روسی علاقے ورونیزھ کے گورنر نے تصدیق کی کہ یوکرینی فوج سے لڑائی میں میجر جنرل ولادیمیر زاوادسکی مارے گئے۔روسی گورنر کے مطابق میجر جنرل ولادیمیر زاوادسکی روسی آرمی کی 14 ویں کور کے ڈپٹی کمانڈر تھے اور ان کی ہلاکت ایک خصوصی آپریشن کے دوران ہوئی۔

روسی عہدیدار نے اس حوالے سے مزید تفصیل نہیں بتائی۔

(جاری ہے)

ولادیمیر زاوادسکی یوکرین کی تقریبا دو سالہ جنگ کے دوران ہلاک ہونے والے ساتویں میجر جنرل ہیں جن کی ہلاکت کی روس کی جانب سے تصدیق کی گئی ہے۔روسی گورنر نے میجر جنرل ولادیمیر زاوادسکی کی موت پر دکھ کا اظہار کرتے ہوئے کہا کہ وہ سابق ٹینک کمانڈر تھے، ان کی موت بھاری نقصان ہے۔خیال رہے کہ یوکرین کی جنگ میں روس کو بھاری جانی نقصان کا سامنا کرنا پڑا ہے۔ روسی صدر ولادیمیر پیوٹن نیگزشتہ دنوں فوجیوں کی تعداد میں 15 فیصد اضافے کے حکم نامے پر دستخط کیے تھے۔ایک بیان میں روسی صدر پیوٹن کا کہنا تھا کہ روس کو خصوصی فوجی آپریشن اور نیٹو کی مسلسل توسیع سے خطرات لاحق ہیں، اس وجہ سے روسی فوج کی طاقت میں اضافہ کیا جا رہا ہے۔