عوام کے ٹیکسوں کا پیسہ عوام پر خرچ کیا جائیگا، این ٹی ایس کے حوالے جھوٹا اور بے بنیاد پروپیگنڈا کیا جارہا ہے، سپیشل ایجوکیشن سینٹر میں 31 دسمبر سے قبل سٹاف کی کمی کو پورا کریں گے، وزیراعظم آزاد کشمیر چوہدری انوارالحق

مظفرآباد (اُردو پوائنٹ اخبارتازہ ترین - اے پی پی۔ 05 دسمبر2023ء) وزیراعظم آزاد جموں و کشمیر چوہدری انوارالحق نے کہا ہے کہ معاشرے کے محروم طبقات کے مسائل کے حل کیلئے حکومت خود چل کر ان کی دہلیز پر جائیگی،کوشش اور خواہش ہے کہ جہاں بھی سٹیٹس کو نظر آئے اس کو جڑ سے اکھاڑ دیں، ، این ٹی ایس کے خاتمے کے حوالے جھوٹا اور بے بنیاد پروپیگنڈا کیا جارہا ہے، این ٹی ایس نہ صرف پوری طرح بحال ہے بلکہ اس میں جو خامیاں تھیں انکو دور کیا جارہا ہے،سپیشل ایجوکیشن سینٹر مظفرآباد کی جملہ ضروریات کو ہر صورت پوراکیاجائیگا، عوام کے ٹیکسوں کا پیسہ عوام پر خرچ کیا جائیگا، میرے عزم میں کوئی کمی نہیں آئے گی، ماضی کی کوتاہیوں کا ازالہ کریں گے اور تمام وسائل عوامی ضروریات کو پورا کرنے کے لئے خرچ کریں گے۔

(جاری ہے)

ان خیالات کا اظہار انہوں نے خصوصی بچوں کے عالمی دن کے موقع پر مظفرآباد میں سپیشل ایجوکیشن سینٹرمیں منعقدہ تقریب سے خطاب کرتے ہوئے کیا۔ وزیراعظم آزادکشمیر نے کہاکہ سپیشل ایجوکیشن سینٹر میں 31 دسمبر سے قبل سٹاف کی کمی کو پورا کریں گے، انشاء اللہ جلد یہ ادارہ کالج کا روپ دھارے گا، سیاسی کارکن ہوں صرف اعلانات کرکے اپنا اعتماد کھونا نہیں چاہتا ہوں۔

وزیراعظم آزادکشمیر نے اس موقع پر 72 گھنٹوں میں سپیشل ایجوکیشن سینٹر کے ہاسٹل کا پی سی ون تیار کرنے کی ہدایت کی۔ وزیراعظم نے ادارے کیلئے 10 لاکھ روپے فیول،5 لاکھ روپے بس مرمتی کیلئے اور ایک لاکھ روپے بچوں کے لئے دینے کا اعلان کیا۔ وزیراعظم آزادکشمیر نے کہاکہ سپیشل ایجوکیشن سینٹر مظفرآباد کی فزیو تھراپی لیب کو جون سے قبل ہر صورت اپ گریڈ کیاجائے گا، اگر مالی مشکلات آڑے آئیں تو وزیراعظم سیکرٹریٹ فزیو تھراپی لیب اپ گریڈ کر کے دیگا۔

انہوں نے کہا کہ آٹے اور بجلی سے زیادہ یہ سپیشل بچے ہمارے لئے اہم ہیں۔ وزیراعظم نے کہا کہ اس موقع پر ان بچوں کے والدین اور اساتذہ کرام کو بھی مبارکباد دیتا ہوں جو ان بچوں کو تربیت دینے کے لئے محنت کر رہے ہیں۔ تقریب سے وزیر سماجی بہبود سید بازل علی نقوی نے بھی خطاب کیا. اس موقع پر ادارے کے اساتذہ اور سپیشل بچوں کے والدین نے بھی شرکت کی۔

وزیر سماجی بہبود سید بازل علی نقوی نے کہاکہ خصوصی بچوں کے عالمی دن کے موقع پرخصوصی بچوں کے اساتذہ کرام اور والدین کومبارکباد دیتاہوں جوانکے ساتھ محنت کررہے ہیں۔ یہ بچے خصوصی صلاحیتوں کے حامل ہیں، سپیشل بچوں کیلئے فنی تعلیم کے فروغ سمیت ان کے لیے مزید مواقع پیدا کریں گے۔ سپیشل ایجوکیشن سینٹر مظفرآباد کو اپ گریڈ کرنے کے ساتھ ساتھ اسکے تمام مسائل کو ہنگامی اور ترجیحی بنیادوں پر حل کیاجائیگا۔ انہوں نے سپیشل ایجوکیشن سینٹر چلانے والی این جی اوز کا خصوصی شکریہ ادا کیا۔