دبئی، زیرتعمیر پینٹ ہاؤس اربوں روپوں میں فروخت، ملک میں مہنگی جائیدادوں کا ایک نیا ریکارڈ بنا دیا

منگل 5 دسمبر 2023 22:48

دبئی (اُردو پوائنٹ اخبارتازہ ترین - آن لائن۔ 05 دسمبر2023ء) دبئی میں ایک زیرتعمیر پینٹ ہاؤس ریکارڈ 13 کروڑ 60 لاکھ ڈالرز میں فروخت ہوا ہے۔اس فروخت نے دبئی میں مہنگی جائیدادوں کا ایک نیا ریکارڈ بنا دیا ہے۔ میڈیا رپورٹس کے مطابق کومو ریذیڈینسیز نامی 71 منزلہ عمارت کے سب سے اوپر لگ بھگ 22 ہزار اسکوائر فٹ رقبے پر پھیلا یہ پینٹ ہاؤس ابھی تک تعمیر نہیں ہوا۔

پام جمیرہ میں واقع یہ پینٹ ہاؤس دنیا کا تیسرا مہنگا ترین پینٹ ہاؤس قرار پایا ہے، اس سے قبل لندن 23 کروڑ 70 لاکھ ڈالرز اور موناکو 44 کروڑ ڈالرز میں مہنگے ترین پینٹ ہاؤس فروخت ہوئے تھے۔

(جاری ہے)

اس پینٹ ہاؤس کی تعمیر 2027 کے آخر تک مکمل ہوگی مگر اسے 3 سال قبل ہی ایک گمنام فرد نے خرید لیا ہے۔ خریدار کا نام تو ابھی تک سامنے نہیں آیا مگر یہ بتایا گیا ہے کہ اس کا تعلق مشرقی یورپ سے ہے۔

اس سے قبل دبئی میں سب سے مہنگا پینٹ ہاؤس کچھ ماہ قبل 11 کروڑ 40 لاکھ ڈالرز میں فروخت ہوا تھا۔دبئی میں فروخت ہونے والے اس نئے پینٹ ہاؤس میں ایک 360 ڈگری اسکائی پول بھی تعمیر کیا جائے گا اور وہاں سے برج الخلیفہ اور دیگر مقامات کا نظارہ کرنا ممکن ہوگا۔دبئی کے علاقے ایمریٹس ہل میں فروخت کے لیے پیش کیے جانے والے گھر کی قیمت 20 کروڑ 40 لاکھ ڈالرز رکھی گئی تھی۔