190 ملین پاؤنڈ سکینڈل کیس ، سابق چیئرمین پی ٹی آئی اور ان کی اہلیہ کی عبوری ضمانتوں میں 13 دسمبر تک توسیع ،آئندہ تاریخ پر درخواستوں پر حتمی دلائل طلب

راولپنڈی (اُردو پوائنٹ اخبارتازہ ترین - آن لائن۔ 06 دسمبر2023ء) اسلام آباد کی خصوصی احتساب عدالت کے جج محمد بشیر نے 190 ملین پاؤنڈ سکینڈل پر مبنی القادر ٹرسٹ کیس میں تحریک انصاف کے سابق چیئرمین اور ان کی اہلیہ بشریٰ بیگم کی عبوری ضمانتوں میں 13 دسمبر تک توسیع کردی ہے اور آئندہ تاریخ درخواستوں پر حتمی دلائل کے لئے مقرر کی ہے عدالت نے توشہ خانہ کیس میں ضمانت میں آئندہ تاریخ تک توسیع کردی ہے عدالت نے القادر ٹرسٹ کیس میں نامزد 3 ملزمان کو مسلسل عدم حاضری پر اشتہاری قرار دینے کی کاروائی کا بھی آغاز کردیا ہے گزشتہ روز سماعت کے موقع پر چیئرمین پی ٹی آئی اور انکی اہلیہ بشریٰ بی بی کمرہ عدالت میں موجود تھے جبکہ چیئرمین تحریک انصاف کے وکلا سردار لطیف کھوسہ اور نیب کے پراسیکیوٹر سردار مظفر عباسی بھی اپنی ٹیم کے ہمراہ عدالت میں پیش ہوئے عدالت نے ملزمان کی حاضری کے بعد سماعت ملتوی کردی جبکہ عدالت نے ریفرنس میں نامزد شریک ملزمان زلفی بخاری، شہزاد اکبر اور ضیا المصطفیٰ نسیم کو بار بار طلب کرنے کے باوجود عدالت پیش نہ ہونے پر ضابطہ فوجداری کی دفعہ 87/88 کے تحت اشتہاری قرار دینے کی کاروائی کا بھی آغاز کردیا ہے آئیندہ تاریخ پر ملزمان کے خلاف کاروائی کو آگے بڑھایا جائے گا بعد ازاں تحریک انصاف کے سابق چیئرمین کے وکیل سردار لطیف کھوسہ نے میڈیا سے گفتگو کرتے ہوئے کہا کہ190 ملین کرائم ایجنسی نے جب برآمد کیا تو نیب کی مرضی سے سپریم کورٹ کے اکاؤنٹ میں آیا تھا چیف جسٹس کی سربراہی میں 35 ارب روپے کو سپریم کورٹ کے اکاؤنٹ میں جمع کیا گیا تھا 190 ملین پاؤنڈ سے سابق چیئرمین اور ان کی اہلیہ بشری بی بی کا کوئی لینا دینا نہیں تھا صرف سابق چیئرمین کو بلایا گیا انہوں نے کہا کہ اس کیس میں ساری کابینہ کو بلایا جانا چاہئے القادر ٹرسٹ اسٹیٹ آف دی آرٹ منصوبہ ہے اور اس سے تعلیم کو فروغ دیا جا رہا ہے یہ منصوبہ نیشنل کرائم ایجنسی، نیب اور رجسڑار سپریم کورٹ کے علم میں ہے ٹرسٹ ڈیڈ میں لکھا ہوا کہ اس میں کسی ٹرسٹی کو زمیں منتقل نہیں کی جا سکتی القادر ٹرسٹ پراپرٹی سابق چیئرمین اور بشری بی بی کی ملکیت نہیں ہے انہوں نے کہا کہ شوکت خانم میں سرکاری خزانے سے ایک روپیہ نہیں لایا گیا لوگوں کی مدد سے چل رہا ہے انہوں نے کہا کہ القادر ٹرسٹ پراپرٹی میں ضمانت میں 13 دسمبر تک توسیع کر دی گئی اور بشری بی بی کے وارنٹ گرفتاری جارہی نہیں ہوئے ان کی گرفتاری مطلوب نہیں لہٰذا بشری بی بی کی گرفتاری کے حوالے سے گردش کرنے والی افواہیں دم توڑ گئیں ہیں توشہ خانہ والے کیس میں ضمانت قبل از گرفتاری 13 دسمبر تک رکھی گئی ہے۔