غزہ پر اسرائیلی بمباری میں مزید 350 فلسطینی شہید

نصیرت کیمپ پر حملے میں 5، مغربی کنارے پر بھی 6 شہادتیں ہوئیں،رپورٹ

جمعہ 8 دسمبر 2023 14:35

مقبوضہ غزہ (اُردو پوائنٹ اخبارتازہ ترین - این این آئی۔ 08 دسمبر2023ء) غزہ پر اسرائیل کے وحشیانہ حملے جاری ہیں جہاں بمباری سے مزید 350 فلسطینی شہید ہوگئے جب کہ مغربی کنارے پر کارروائی میں بھی 6 فلسطینی شہید ہوئے۔غیرملکی خبررساں ادارے کے مطابق اسرائیلی فوج کا کہناتھا کہ اس نے غزہ میں 250 اہداف کو نشانہ بنایا اور زمینی آپریشن میں اس کے مزید 2 فوجی مارے گئے جس کے بعد زمینی آپریشن میں ہلاک فوجیوں کی تعداد89 ہوگئی ہے۔

اسرائیلی فوج نے غزہ کی پٹی پر صحت سہولیات مراکز پر حملے جاری رکھے ہوئے ہیں۔ اسرائیلی فوج نے غزہ کی پٹی پر رفاح سے متعدد افراد کو حراست میں بھی لیا ہے، یہ تمام افراد اقوام متحدہ سے منسلک ایک اسکول میں موجود تھے جہاں شدید فائرنگ کے دوران اسرائیلی فوج نے ان تمام افراد کو گھیرے میں لے کر حراست میں لے لیا۔

(جاری ہے)

اسرائیلی فوجیوں نے حراست میں لیے گئے افراد کے کپڑے اتاردیے اور ان کی آنکھوں پر سیاہ پٹیاں باندھ دیں جس کے بعد انہیں تشدد کا نشانہ بھی بنایا گیا۔

اس کے علاوہ اسرائیلی فوج نے غزہ کی پٹی پر جبالیہ کیمپ اور اطراف کے علاقوں کو نشانہ بنایا ہے جب کہ نصیرت کیمپ میں فضائی حملے میں بھی 5 فلسطینی شہید ہوگئے۔حکام کا کہنا تھاکہ غزہ کی پٹی پر اسرائیل کی مسلسل بمباری سے انسانی امداد کے لیے جاری کوششوں کو نقصان پہنچ رہا ہے۔اسرائیلی فوج نے مغربی کنارے پر کارروائی کے دوران 6 فلسطینیوں کو شہید کردیا۔عرب میڈیا کے مطابق اسرائیلی فوج نے جمعرات اور جمعہ کی درمیانی شب مغربی کنارے پرکارروائی کی جس دوران نہتے فلسطینیوں کو فائرنگ کا نشانہ بنایا گیا۔فلسطینی وزارت صحت نے اسرائیلی فوج کی کارروائی میں 6 فلسطینیوں کی شہادت کی تصدیق کی ۔