جہانگیر ترین نے جڑانوالہ اور کھرڑیانوالہ کے دو سکولوں میں جدید ترین کمپیوٹر لیبز کا افتتاح کر دیا

ہفتہ 9 دسمبر 2023 19:50

لاہور (اُردو پوائنٹ اخبارتازہ ترین - اے پی پی۔ 09 دسمبر2023ء) سربراہ استحکام پاکستان پارٹی جہانگیر ترین نے فیصل آباد کا دورہ کیا، جڑانوالہ اور کھرڑیانوالہ کے دو سکولوں میں جدید ترین کمپیوٹر لیبز کا افتتاح کر دیا، کمپیوٹر لیبز ترین ایجوکیشن فاؤنڈیشن کی جانب سے اپ گریڈ کی گئی ہیں جن کی اپ گریڈیشن پر ایک کروڑ روپے لاگت آئی ہے۔ اس موقع پر سینئر رہنما آئی پی پی اسحاق خاکوانی، ڈپٹی کمشنر فیصل آباد عبداللہ نیر شیخ، اسسٹنٹ کمشنر جڑانوالہ عبد الحنان، سی ای او ترین ایجوکیشن فاؤنڈیشن اکبر خان و دیگر بھی موجود تھے۔

افتتاحی تقریب سے خطاب کرتے ہوئے جہانگیر ترین نے کہا کہ اہلیان جڑانوالہ سے کیا گیا وعدہ پورا کر دیا ہے، معیاری اور جدید تعلیم ہی ترقی کا واحد راستہ ہے، تعلیم یافتہ افراد ملک کی تقدیر بدل سکتے ہیں، تعلیمی ترقی کسی بھی ملک کی معیشت کی بحالی میں اہم کردار ادا کرسکتی ہے۔

(جاری ہے)

ان کا کہنا تھا کہ طلباو طالبات کو ترقی کی منازل طے کرنے کے لئے اپنی سوچ بڑی رکھنا ہو گی، انہیں یہ سوچ کر آگے بڑھنا ہو گا کہ ہم آسمان تک کیسے پہنچ سکتے ہیں، ہمیں اپنی سوچ بدلنے کی ضرورت ہے، ملک کے تعلیمی نظام میں بھی اصلاحات کی ضرورت ہے۔

جہانگیر ترین نے مزید کہا کہ لودھراں میں ہم نے آئی ٹی کی جدید تعلیم کی فراہمی کے لئے ایک ادارہ ٹائسر بنایا ہے، لودھراں کے 80 فیصد سکولوں میں ہم نے جدید تعلیم کی فراہمی کے لئے کمپیوٹر اور سائنس لیبارٹریز بنائی ہیں۔ انہوں نے کہا کہ طلبا و طالبات کو ہر ممکن سہولیات کی فراہمی کے لیے اپنا بھرپور کردار ادا کرتے رہیں گے۔