صوبائی دارالحکومت لاہورمیں انسانی حقوق کا عالمی دن منایا گیا

اتوار 10 دسمبر 2023 17:20

لاہور (اُردو پوائنٹ اخبارتازہ ترین - اے پی پی۔ 10 دسمبر2023ء) دنیا بھر کی طرح صوبائی دارالحکومت لاہور میں بھی اتوار کے روز انسانی حقوق کا عالمی دن منایا گیا ۔ اس سلسلہ میں لاہور کے مختلف مقامات پر تقریبات اور سیمینارز منعقد کئے گئے جن سے خطاب کرتے ہوئے مقررین نے کہا کہ اس عالمی دن کو منانے کا مقصد انسانی حقوق کے بارے میں بین الاقوامی سطح پر عوام میں شعور اجاگرکرنا اور ان کی پاسداری کے اقدامات کی حوصلہ افزائی کرنا ہے۔

انسانی حقوق کا یہ عالمی دن جہاں عالمی طاقتوں کی توجہ اس کرہ ارض پر بسنے والے انسانوں کو درپیش چیلنجز کی طرف مبذول کرا رہا ہے وہیں مظلوم فلسطینی اپنے دکھوں کے مداوے کیلئے انسانیت کے علمبرداروں کی طرف نظریں جمائے ہوئے ہیں۔اقوام متحدہ کی طرف سے سال 2023کو انسانی حقوق کے دن کیلئے آزادی، برابری اور سب کیلئے انصاف کا عنوان دیا گیا ۔

(جاری ہے)

مقررین نے کہا کہ بھارت انسانی حقوق کی خلاف ورزیو ں میں سر فہرست ہے جو کشمیر میں بے گناہ افراد پر ظلم و ستم ڈھا اور کھلم کھلا انسانی حقوق کی ورزی کر رہا ہے۔

انسانی حقوق کا عالمی دن اس موقع پر منایا جارہا ہے کہ جب غزہ لہو لہو ہے ، اس کی دھرتی پر انسانیت سسک رہی ہے ،جہاں 7اکتوبر سے اب تک ساڑھے 17 ہزار سے زائد فلسطینی شہری بمباری سے مارے جاچکے ہیں ، صرف یہی نہیں رہائشی بستیوں سمیت ہسپتالوں اور امدادی کیمپوں تک کو بھی وحشیانہ حملوں کا نشانہ بنایا جا رہا ہے۔اسرائیلی جارحیت کی زد میں غزہ کھنڈر میں تبدیل ہوگیا ہے اور جہاں سینکڑوں معصوم فلسطینی بچے ،خواتین ،مردو بزرگ ملبے تلے دبے ہوئے ہیں ۔ مقررین نے کہاکہ آج غزہ کی صورتحال انسانی حقوق کے علمبرداروں کیلئے جہاں ایک چیلنج بن چکی ہے، تو دوسری طرف مقبوضہ کشمیر میں بڑھتے ہوئے بھارتی مظالم بھی عالمی برادری کے ضمیر کو جھنجھوڑ رہے ہیں ۔