شہید پولیس ہیڈ کانسٹیبل بنوں محمداشرف خان کی نماز جنازہ پولیس لائن میں سرکاری اعزاز کیساتھ ادا کردی گئی

ریجنل پولیس آفیسر بنوں ڈویژن قاسم علی خان، ڈسٹرکٹ پولیس آفیسر بنوں افتخار شاہ کی شرکت ، پولیس کے چاق وچوبند دستے نے شہید کے جسد خاکی کو سلامی پیش کی

اتوار 10 دسمبر 2023 19:25

پشاور(اُردو پوائنٹ اخبارتازہ ترین - این این آئی۔ 10 دسمبر2023ء) بنوں میں شہید پولیس ہیڈ کانسٹیبل محمداشرف خان کی نماز جنازہ پولیس لائن میں سرکاری اعزاز کے ساتھ ادا کرنے کے بعد شہید کے جسد خاکی کو ان کے آبائی گائوں کو روانہ کیاگیا جہاں پر شہید کو پورے سرکاری اعزاز کیساتھ سپرد خاک کردیاگیا۔نماز جنازہ میں ریجنل پولیس آفیسر بنوں ڈویژن قاسم علی خان اور ڈسٹرکٹ پولیس آفیسر بنوں افتخار شاہ سمیت پولیس افسران و اہلکاروں اور مقامی افراد نے کثیر تعداد میں شرکت کی۔

واضح رہے کہ شہید پولیس ہیڈ کانسٹیبل بنوں محمد اشرف تھانہ صدر میں تعینات تھے اور انسدادِ پولیو مہم کے دوران اپنے فرائض انجام دیتے ہوئے نامعلوم دہشتگردوں کی فائرنگ سے زخمی ہوئے،ا نہیں علاج معالجے کی خاطر لیڈی ریڈنگ ہسپتال پشاور ریفر کیا گیا تاہم وہ زخموں کی تاب نہ لاتہ ہوئے شہادت کے مرتبے پر فائز ہوئے۔

(جاری ہے)

آر پی او بنوں قاسم علی خان اور دیگر پولیس آفسران نے قومی پرچم میں لپٹے شہید کے تابوت پر پھول چڑھائے اور ان کی مغفرت کے لئے خصوصی دعا کی۔

اس موقع پر ریجنل پولیس آفیسرقاسم علی خان نے پیغام جاری کرتے ہوئے کہا کہ شہید پولیس اہلکار محمد اشرف خان جیسے جوان ہمارا فخر ہیں جنہوں نے ملک و قوم کی سلامتی و بقا کی خاطر اپنی جان قربان کردی،ہم ان جانبازوں کو کبھی نہیں بھولیں گے۔انہوں نے اپنے پیغام میں کہا کہ دہشتگرد اپنے ناپاک عزائم سے ہمارے حوصلے پست نہیں کرسکتے، ہم ان کا ڈٹ کر مقابلہ کریں گے اور ان کے ناپاک عزائم خاک میں ملا دیں گے۔