بھارت مقبوضہ کشمیر میں گزشتہ سات دہائیوں سے انسانیت سوز مظالم کامرتکب ہورہاہے،صدرآزادکشمیر

اتوار 10 دسمبر 2023 20:30

مظفر آباد (اُردو پوائنٹ اخبارتازہ ترین - اے پی پی۔ 10 دسمبر2023ء) صدر آزاد جموں وکشمیر بیرسٹر سلطان محمود چوہدری نے کہا ہے کہ آج دنیا بھر میں انسانی حقوق کا عالمی دن منایا جا رہا ہے ،ہم اس موقع پر عالمی برادری کی توجہ مقبوضہ کشمیر میں بڑے پیمانے پر جاری ظلم و بربریت کی طرف مبذول کرانا چاہتے ہیں، دنیا کو دوہرا معیار ختم کرنا چاہیے ،ہم آزادکشمیر میں انسانی حقوق کی وزارت قائم کریں گے تاکہ آزادی کے بیس کیمپ سے مقبوضہ کشمیر میں جاری مظالم کے خلاف بھرپور انداز میں آواز اُٹھائی جا سکے۔

(جاری ہے)

انہوں نے ان خیالات کا اظہار انسانی حقوق کے عالمی دن کے موقع پر اپنے جاری خصوصی پیغام میں کیا، انہوں نے کہا کہ انسانی حقوق کے عالمی دن کے موقع پر عالمی برادری اور انسانی حقوق کی بین الاقوامی تنظیموں کی توجہ مقبوضہ کشمیر میں جاری بھارتی مظالم کی طرف مبذول کرانی چاہیے کیونکہ بھارت مقبوضہ کشمیر میں گزشتہ سات دہائیوں سے انسانی حقوق کو پامال کرتے ہوئے کشمیریوں پر انسانیت سوز مظالم کے پہاڑ توڑ رہا ہے بالخصوص 5اگست2019کے بھارت کی طرف سے مقبوضہ کشمیر کی خصوصی حیثیت ختم کرنے کے غیر آئینی اقدام کے بعد مقبوضہ کشمیر میں بسنے والے کشمیریوں پر اُن کی ہی زمین تنگ کر دی گئی ہے، بھارتی قابض افواج جعلی مقابلوں میں کشمیری نوجوانوں کو قتل، عورتوں کی عصمت دری اور پیلٹ گن کے استعمال جیسے اوچھے ہتھکنڈے استعمال کر رہی ہیں، ہندوستان مقبوضہ کشمیر میں آبادی کے تناسب کو تبدیل کرنے کے لئے غیر ریاستی ہندوؤں کو مقبوضہ کشمیرمیں آباد کر رہا ہے تاکہ آبادی کے تناسب کو تبدیل کیا جا سکے اور مقبوضہ کشمیر کی حلقہ بندیاں بھی تبدیل کی جا رہی ہیں تاکہ بھارت مقبوضہ کشمیر میں ایک ہندؤ وزیر اعلیٰ لانے کی راہ ہموارکر سکے، ہمیں بھارت کی ان تمام ریشہ دوانیوں کو دنیا کے سامنے لانا ہو گا تا کہ اُس کا مکروہ چہرہ بے نقاب ہو سکے۔