ڈپٹی کمشنر اسلام آباد عرفان نواز میمن کیخلاف توہین عدالت کیس میں بڑی پیشرفت

عدالت اختیارات سے تجاوز کرکے ایم پی او جاری کرنے کا کیس 16 جنوری سے روزانہ کی بنیاد پر سنے گی

ہفتہ 16 دسمبر 2023 23:03

اسلام آباد (اُردو پوائنٹ اخبارتازہ ترین - این این آئی۔ 16 دسمبر2023ء) ڈپٹی کمشنر اسلام آباد عرفان نواز میمن کے خلاف توہین عدالت کیس میں بڑی پیشرفت ہوئی ہے، اسلام آباد ہائیکورٹ اختیارات سے تجاوز کرکے ایم پی او جاری کرنے کا کیس 16 جنوری سے روزانہ کی بنیاد پر سنے گی۔شہریار آفریدی کے خلاف اختیارات سے تجاوز کرکے ایم پی او جاری کرنے پر ڈپٹی کمشنر اسلام آباد عرفان نواز میمن کے خلاف توہین عدالت کیس میں بڑی پیش رفت ہوئی ہے۔

اسلام آباد ہائیکورٹ نے 16 جنوری سے کیس کی روزانہ سماعت کا فیصلہ کرلیا۔جسٹس بابرستارنے ایک صفحے کا تحریری حکم نامہ جاری کر دیا، جس میں کہا گیا کہ وکلاء کی عدم دستیابی کی وجہ سماعت نہ ہوسکی، ٹرائل مکمل کرنے کے لیے آئندہ سماعت 16 جنوری سے روزانہ کی بنیاد پر سماعت ہوگی۔

(جاری ہے)

تحریری حکم نامے میں کہا گیا کہ ڈی سی اسلام آباد اوردیگربیان حلفی یا کوئی دستاویزجمع کرانے چاہتے ہیں تو کرا سکتے ہیں، شہریارآفریدی کے خلاف اختیارات سے تجاوزکرکے ایم پی اوجاری کرنے پر توہین عدالت کی کارروائی جاری ہے۔

عدالت نے اپنے حکم نامے میں کہا کہ ایس ایس پی آپریشنز جمیل ظفر و دیگر دو افسران کے خلاف بھی توہین عدالت کاروائی جاری ہے۔خیال رہے کہ شہریار آفریدی توہین عدالت کیس میں ڈپٹی کمشنر اسلام آباد نے غیر مشروط معافی مانگی تھی۔اسلام آباد ہائی کورٹ نے قومی اسمبلی کے این ای53 اور پنجاب اسمبلی کے پی پی 10 کی حلقہ بندیاں چیلنج کرنے کی درخواست مسترد کردی۔

چیف جسٹس اسلام آباد ہائی کورٹ عامر فاروق نے چوہدری نثار کے قریبی دوست شیخ ساجد الرحمن کی حلقہ بندیاں کالعدم قرار دینے کی درخواست کا فیصلہ جاری کردیا۔عدالتی فیصلے میں کہا گیا کہ الیکشن کمیشن کو حلقہ بندیاں کرتے ہوئے متعدد اعتراضات کو نمٹانا پڑتا ہے، ضروری نہیں الیکشن کمیشن تفصیلی وجوہات بیان کرے، این اے 53 اور پی پی 10 کی حلقہ بندیوں میں کوئی قانونی سقم نہیں۔

تحریری فیصلے میں کہا گیا کہ الیکشن کمیشن کی حلقہ بندیوں میں عدالتی مداخلت کی ضرورت نہیں، درخواست گزار وکیل بھی بیضابطگی کی نشاندہی کرنے سے قاصر رہے، این اے 53 اور پی پی10کی حلقہ بندیوں کے خلاف درخواست مسترد کی جاتی ہے۔واضح رہے کہ گزشتہ روز اسلام آباد ہائی کورٹ نے اہم فیصلہ دیتے ہوئے قومی اسمبلی کے 2 حلقوں این اے 35 اور این اے 36 کی حلقہ بندیاں کالعدم قرار دی تھیں۔عدالت عالیہ نے الیکشن کمیشن کو تمام فریقین کو دوبارہ سن کر ازسر نو حلقہ بندی کرنے کی ہدایت کر رکھی ہے۔