سابق وفاقی وزیر سابق وفاقی وزیر سرتاج عزیزایچ ایٹ قبرستان میں سپرد خاک، نماز جنازہ میں سابق وزیر اعظم شاہد خاقان عباسی، ڈاکٹر طارق فضل، راجہ ظفر الحق اور مختلف ممالک کے سفرا کی شرکت

اسلام آباد (اُردو پوائنٹ اخبارتازہ ترین - اے پی پی۔ 03 جنوری2024ء) سابق وفاقی وزیر سرتاج عزیز کی نماز جنازہ ایچ ایٹ قبرستان میں ادا کردی گئی ۔ نماز جنازہ میں سیاسی شخصیات ، مختلف ممالک کے سفرا نے شرکت کی ۔ سرتاج عزیز کی رسم قل کل 3 بجے چک شہزاد فارم ہائوس پر ہوگی ۔ سرتاج عزیز گزشتہ روز طویل علالت کے باعث انتقال کر گئے تھے ۔ ان کی عمر 94 سال تھی ۔

بدھ کو سرتاج عزیز کی نماز جنازہ میں سرتاج عزیز کے اہل خانہ، عزیز و اقارب ، سابق وزیر اعظم شاہد خاقان عباسی، ڈاکٹر طارق فضل، چوہدری تنویر حسین، شکیل اعوان ، فرحت اللہ بابر، صدیق الفاروق، سابق وفاقی وزیر نثار میمن، اعجاز الحق ،سردار مہتاب خان، لیفٹیننٹ جنرل ریٹائرڈ عبدالقیوم، زبیر قصوری، سابق پی آئی او راؤ تحسین علی خان، راجہ ظفر الحق ، مختلف ممالک کے سفرا شریک تھے ۔

(جاری ہے)

واضح رہے کہ سرتاج عزیز کا پاکستان میں وزارت خزانہ اور نیشنل پلاننگ کمیشن میں سرکاری ملازم کے طور پر ایک ممتاز کیریئر رہا ہے۔ 1971 میں، انہوں نے فوڈ اینڈ ایگریکلچر آرگنائزیشن (FAO) کے کموڈٹیز اینڈ ٹریڈ ڈویژن کے ڈائریکٹر کے طور پر اپنے بین الاقوامی کیریئر کا آغاز کیا۔ انہوں نے بین الاقوامی فنڈ فار ایگریکلچرل ڈویلپمنٹ (IFAD) کے اسسٹنٹ صدر کے طور پر بھی خدمات انجام دیں جو کہ اقوام متحدہ کی ایک خصوصی ایجنسی ہے ۔

انہوں نے اپنے سیاسی کیریئر کا آغاز وزیر مملکت برائے خوراک و زراعت کے طور پر کیا، اس کے بعد انہوں نے وزیر خزانہ واقتصادی امور کے طور پر خدمات انجام دیں، اور وزیر خارجہ کا عہدہ سنبھالا۔ وہ 1985 سے 1999 تک پاکستان سینیٹ کے رکن رہے۔ 2004 سے 2013 تک سرتاج عزیز نے بیکن ہاؤس نیشنل یونیورسٹی کے پہلے وائس چانسلر کے طور پر خدمات انجام دیں۔ 2013 کے انتخابات کے بعد، انہوں نے قومی سلامتی اور خارجہ امور کے وزیر اعظم کے مشیر اور پھر پلاننگ کمیشن کے ڈپٹی چیئرمین کے طور پر اپنا سیاسی کیریئر دوبارہ شروع کیا۔