منہاج القرآن علما کونسل کے زیر اہتمام شان صدیق اکبر کانفرنس کا انعقاد

اتوار 7 جنوری 2024 20:40

لاہور (اُردو پوائنٹ اخبارتازہ ترین - اے پی پی۔ 07 جنوری2024ء) تحریک منہاج القرآن کے بانی و سرپرست ڈاکٹر محمد طاہر القادری نے مرکزی سیکرٹریٹ میں اتوار کے روز منہاج القرآن علما کونسل کے زیر اہتمام منعقدہ شان صدیق اکبر کانفرنس سے ویڈیو لنک خطاب کرتے ہوئے کہا کہ سورہ توبہ میں سیدنا ابوبکر صدیق کی صحابیت اور صدیقیت پر نص قرآنی وارد ہوئی، یہ فضیلت قرآن کی عطا کردہ ہے۔

انہوں نے کہا کہ سیدنا علی کرم اللہ نے ارشاد فرمایا کہ اے باری تعالی ہمیں اسی طرح سیدھی راہ پر رکھ جس طرح تونے خلفائے راشدین کو صالحیت اور سیدھی راہ پر رکھا، سوال ہوا یہ خلفائے راشدین کون ہیں؟ مولا علی نے فرمایا سیدنا ابوبکر صدیق اور سیدناعمر فاروق اور ساتھ فرمایا یہ امت کے شیخ الاسلام ہیں۔

(جاری ہے)

شان سیدنا صدیق اکبر کانفرنس میں ناظم اعلی خرم نواز گنڈاپور نے علمائے کرام کو خوش آمدید کہا ۔

خرم نواز گنڈاپور نے کہا کہ منہاج القرآن فی زمانہ عقائد صحیحہ کی ترویج و اشاعت اور بین المسالک ہم آہنگی اور اتحاد امت کی عالمگیر تحریک ہے۔ سید ضیا اللہ شاہ بخاری نے کہا کہ سیدنا صدیق اکبر کا شمار تاجدارِ کائنات کے ان رفقائے کار میں ہوتا ہے جنہوں نے اپنی زندگی کی تمام جمع پونجی اسلام پر خرچ کردی۔ علامہ شہزاد مجددی سیفی سربراہ دار الاخلاص لاہور نے کہا کہ سیدنا صدیق اکبر وہ ہستی ہیں جنہوں نے صاحبِ قرآن کے سینے سے قرآن لیا اور یہ ہستیاں کتابوں اور عبارات سے سمجھ میں آنے والی نہیں ہیں۔

انہیں ادب اور دل کی نظر سے دیکھنا ہوگا۔ کانفرنس میں ناظم اعلی نظام المدارس پاکستان و مرکزی نائب ناظم اعلی منہاج القرآن علما کونسل ڈاکٹر میر آصف اکبر قادری، مرکزی صدر منہاج علما کونسل مفتی غلام اصغر صدیقی، مرکزی نائب صدر راجہ زاہد محمود، مرکزی ناظم علما کونسل علامہ اشفاق چشتی، پیر سیدِ آلِ احمد سجادہ نشین آستانہ عالیہ سوہدرہ شریف وزیر آباد، علامہ غلام مرتضی علوی، علامہ ڈاکٹر نور الزمان نوری سمیت علمائے کرام اور عوام نے بڑی تعداد میں شرکت کی۔