ْلاہور ہائیکورٹ ملتان بنچ میں الیکشن ٹریبونل میں 30 سے زائد اپیلوں پر سماعت مکمل کر لی گئی

ہائیکورٹ ملتان بنچ اپیلیٹ ٹربیونل کے ججز جسٹس سردار محمد سرفراز ڈوگر اور جسٹس علی ضیا باجوہ اپیلوں پر سماعت کی تھی

اتوار 7 جنوری 2024 22:40

لاہور/ملتان(اُردو پوائنٹ اخبارتازہ ترین - این این آئی۔ 07 جنوری2024ء) لاہور ہائیکورٹ ملتان بنچ میں قائم الیکشن ٹریبونلز میں اپیلوں پر سماعت کا سلسلہ جاری ہے ،وہاڑی سے تعلق رکھنے والی مسلم لیگ (ن)کی رہنما تہمینہ دولتانہ اور ان کے بیٹے کی اپیلیں منظور کر کے الیکشن میں حصہ لینے کی اجازت مل گئی۔لاہور ہائیکورٹ ملتان بنچ میں چھٹی کے روز بھی الیکشن ٹریبونل میں 30 سے زائد اپیلوں پر سماعت کی گئی ،لیہ سے این اے 181 پی ٹی آئی کے امیدوار عبدالمجید نیازی کی اپیل خارج کر کے الیکشن کے لئے نا اہل قرار دے دیا گیا جبکہ عبدالمجید نیازی کی اہلیہ عنبر مجید نیازی کی اپیل کل تک ملتوی کردی گئی۔

مظفرگڑھ سے جمشید دستی کی اپیل پر وکلا ء کے دلائل مکمل کر لیے گئے ہیں ۔اپیلیٹ ٹربیونل کے جسٹس سردار محمد سرفراز ڈوگر نے جمشید دستی کی اپیل پر فیصلہ محفوظ کرلیا۔

(جاری ہے)

وہاڑی سے سابق وفاقی وزیر تہمینہ دولتانہ کے کاغذات نامزدگی کی اپیل کو منظورکر لیا گیا ،تہمینہ دولتانہ این اے 158 کے ساتھ پی پی 230 سے بھی الیکشن لڑنے کی اجازت دے دی گئی ،وہاڑی پی پی 230 سے میاں عرفان عقیل دولتانہ کے کاغذات نامزدگی کی اپیل بھی منظور کر کے الیکشن کے لئے اہل قرار دیا گیا ہے۔ہائیکورٹ ملتان بینچ اپیلیٹ ٹربیونل کے ججز جسٹس سردار محمد سرفراز ڈوگر اور جسٹس علی ضیا باجوہ اپیلوں پر سماعت کی تھی۔