پاکستانی ہدایتکارپرمیش اڈیوال نے اسلام قبول کرکے عمرے کی سعادت حاصل کرلی

بدھ 10 جنوری 2024 23:10

مدینہ منورہ (اُردو پوائنٹ اخبارتازہ ترین - آن لائن۔ 10 جنوری2024ء) پاکستانی معروف ہدایت کار پرمیش اڈیوال نے اسلام قبول کرکے عمرے کی سعادت حاصل کرلی۔فوٹو اینڈ ویڈیو شیئرنگ پلیٹ فارم انسٹاگرام پر ہدایت کار نے مسجد نبوی سے روح پرور ویڈیو شیئر کی ہے۔مذکورہ ویڈیو کے ذریعے انہوں نے اپنے اسلام قبول کرنے کا اعلان کرنے کے ساتھ ساتھ اس روحانی سفر کو بھی عکس بند کیا ہے۔

ویڈیو میں ہدایت کار کو بارگاہ الہی میں کھڑے ہوکر دعا مانگتے ہوئے دیکھا جاسکتا ہے۔

(جاری ہے)

ہندو مہذب کو خیر باد کہنے والے پرمیش اڈیوال کی انسٹا اسٹوری سے معلوم ہوتا ہے کہ انہوں نے دائرہ اسلام میں داخل ہونے کے بعد اپنا نام محمد رکھ لیا ہے۔نومسلم محمد کی جانب سے شیئر کردہ ویڈیو کے پس منظر میں معروف گلوکار عاطف اسلم کی آواز میں ریکارڈ کی گئی قوالی تاجدارِ حرم سنائی دے رہی ہے۔

سوشل میڈیا پر اسلام قبول کرنے کے اعلان کے بعد ہدایت کار کی پوسٹ پر ساتھی فنکاروں کی جانب سے مبارک باد کا سلسلہ جاری ہے۔نومسلم محمد نے فرحان سعید کی آواز میں ریکارڈ کیے گئے فلم پنجاب نہیں جاوں گی کے گانے رب رکھا، عروہ حسین کے ڈیبیو گانے آو لے کر چلوں، فلک شبیر کے گانے یار ملا دے سمیت مختلف کمرشل، او ایس ٹی اور میوزک ویڈیوز کی ہدایت کاری کی ہے۔