لاہورسمیت پنجاب کے اکثرعلاقوں میں موسم سرد ، دھند وسموگ کے باعث درجہ حرارت کم رہنے کا امکان

ہفتہ 27 جنوری 2024 18:07

لاہور (اُردو پوائنٹ اخبارتازہ ترین - اے پی پی۔ 27 جنوری2024ء) محکمہ موسمیات نے پیش گوئی کی ہے کہ آئندہ چوبیس گھنٹوں کے دوران صوبائی دارالحکومت سمیت پنجاب کے اکثر علاقوں میں موسم شدید سرد ،خشک جبکہ د ھند اور سموگ کے باعث دن کے اوقات میں درجہ حرارت کم رہنے کا امکان ہے ،شہر یوں کو غیر ضروری سفر سے اجتناب و محتاط ڈرائیونگ کی ہدایت کی گئی ہے ۔

ترجمان محکمہ موسمیات کے مطابق گزشتہ چوبیس گھنٹوں کے دوران پنجاب کے بیشترعلاقوں میں موسم شدید سرد،خشک اور دھند چھائی رہی جس سے حد نگاہ انتہائی کم ہو گئی جبکہ آئندہ چوبیس گھنٹوں کے دوران صبح اور رات کے اوقات میں لاہور، سیالکوٹ، گوجرانوالہ،نارووال، نارنگ منڈی ،سرگودھا، اوکاڑہ،فیصل آباد، ٹوبہ ٹیک سنگھ،جھنگ،خانیوال ،ملتان ، بہا ولپور ، ڈیرہ غا زی خان اور گر دو نواح میں شدید دھندوسموگ چھائے رہنے کی توقع ہے ۔

(جاری ہے)

ترجمان کے مطابق لاہور میں کم سے کم درجہ حرارت09 اورزیادہ سے زیادہ21سینٹی گریڈ ریکارڈ کیا گیا جبکہ ہوا میں نمی کا تناسب 55 فیصد رہا۔لا ہور میں آلودگی کی مجموعی شرح 172 رہی،اسی طرح شہر کے دیگر علاقوں شاہراہ قائد اعظم239 ،سید مراتب علی روڈ 173 ،سی ای آر پی آفس174 ،ڈی ایچ اے فیز میں 221 ،ذکی فارمز 191 ،فدا حسین ہائوس 182 اور پاکستان انجینئرنگ سروسز میں178 ایئر کوالٹی انڈیکس ریکارڈ کیا گیا۔