ملک کے کچھ علاقوں میں گرج چمک کے ساتھ بارش،ژالہ باری جبکہ دیگر میں موسم گرم اورخشک رہنے کا امکان ہے، محکمہ موسمیات

بدھ 9 اپریل 2025 22:43

اسلام آباد (اُردو پوائنٹ اخبارتازہ ترین - اے پی پی۔ 09 اپریل2025ء) محکمہ موسمیات کے مطابق جمعرات کو خیبرپختونخوا، کشمیر ،گلگت بلتستان، بالائی پنجاب، اسلام ا ٓباد اور شمال مشرقی بلوچستان میں مطلع جزوی ابرآلود رہنے کے علاوہ تیز ہواؤں/آندھی اور گرج چمک کے ساتھ بارش کا امکان ہے،اس دوران چند مقامات پرژالہ باری بھی ہو سکتی ہےجبکہ ملک کے دیگرعلاقوں میں موسم گرم اورخشک رہنے کا امکان ہے۔

گزشتہ 24 گھنٹوں کے دوران ملک کے بیشتر علاقوں میں موسم خشک جبکہ میدانی علاقوں میں گرم رہا تاہم خطہ پوٹھوہار ، اسلام آباد، بالائی خیبرپختونخوا، کشمیر اور گلگت بلتستان میں تیز ہواؤں،آندھی اور گرج چمک کے ساتھ بارش ہوئی جبکہ خطہ ٔپوٹھوہار میں چند مقامات پرژالہ باری بھی ہوئی۔

(جاری ہے)

سب سے زیادہ بارش پنجاب میں مری 29، اسلام آباد (زیروپوائنٹ 12، گولڑہ 7، بوکرا ایک )، راولپنڈی (چکلالہ ائرپورٹ 6، شمس آباد 5، کچہری 2)،ڈی جی خان1، خیبرپختونخوا میں میر کھانی 12، کاکول 11، پٹن 09، مالم جبہ،بالاکوٹ7، دروش4، کالام6،دیر 3، سیدو شریف1،کشمیر میں مظفرآباد (ائرپورٹ 8، سٹی 8)، راولاکوٹ8، گڑھی دوپٹہ 7، کوٹلی 4، گلگت بلتستان میں استور 2، سکردو، چلاس میں ایک ملی میٹر بارش ریکارڈ کی گئی ۔

بدھ کوریکارڈکئے گئے زیادہ سےزیادہ درجہ حرارت بہاولنگر45، بہاولپور،سکھر،روہڑی، مٹھی اور شہید بینظیر آباد میں 44 ڈگری سینٹی گریڈ ریکارڈ کیا گیا۔