اپنی فریاد کہاں لیکر جائیں کہاں سے انصاف ملے گا، شاہ محمود قریشی

ہفتہ 27 جنوری 2024 22:57

راولپنڈی (اُردو پوائنٹ اخبارتازہ ترین - آن لائن۔ 27 جنوری2024ء) پی ٹی آئی رہنما شاہ محمود قریشی نے کہا ہے کہ میرے گھر چھاپہ مار کر 8 لوگ گرفتار کیے گئے، ہمارے خلاف جو کچھ ہو رہا ہے یہ لیول پلیئنگ فیلڈ نہیں ہے، اپنی فریاد کہاں لیکر جائیں کہاں سے انصاف ملے گا۔ اڈیالہ جیل میں میڈیا سے بات چیت کرتے ہوئے انہوں نے زور دیا کہ چیف جسٹس اور چیف الیکشن کمشنر سے اپیل ہے کہ لیول پلیئنگ فیلڈ کے معاملے پر ہمارے مطالبہ پر غور کیا جائے، جاوید ہاشمی کے گھر پر حملہ کرکے ہماری میٹنگ کو روکا گیا۔

(جاری ہے)

شاہ محمود قریشی نے کہا کہ ن لیگ اور پیپلز پارٹی کو جلسوں کی کھلی اجازت دی گئی ہے، پی ڈی ایم کے اندر واضح اختلاف سامنے آ رہا ہے جبکہ پیپلز پارٹی بانی پی ٹی آئی عمران خان کے مؤقف کی تائید کر رہی ہے کہ ایون فیلڈ اپارٹمنٹ کرپشن کی رقم سے بنائے گئے۔ انہوں نے کہا کہ یہ کس قسم کا الیکشن ہے ایسے ماحول میں الیکشن کو قوم اور دنیا قبول نہیں کرے گی، ڈھونگ الیکشن کے زریعے ملکی پیسے کا ضیاع ، جمہوریت کا گلا گھونٹا اور آئین سے مذاق جاری ہے۔انہوں نے کہا کہ ہمارے بنیادی حقوق کو روندا جارہا ہے، نہال ہاشمی اور جی ڈی اے کہتے ہیں پیپلز پارٹی سندھ میں انتخابات میں لوکل گورنمنٹ کے وسائل استعمال کر رہی ہے۔