لاہورپریس کلب کی ریلی میںصحافی کے ساتھ پولیس گردی کی شدید مذمت

پولیس ملازمین کیخلاف فوری کارروائی نہ ہوئی تو بصورت دیگر احتجاج کا راستہ اختیار کیا جائیگا

اتوار 28 جنوری 2024 17:40

لاہور(اُردو پوائنٹ اخبارتازہ ترین - این این آئی۔ 28 جنوری2024ء) لاہورپریس کلب کے صدر ارشد انصاری ، سینئر نائب صدر شیراز حسنات ، نائب صدر امجد عثمانی ، سیکرٹری زاہد عابد ، جوائنٹ سیکرٹری جعفر بن یار ، فنانس سیکرٹری سالک نواز اور اراکین گورننگ باڈی نے این اے 126 کے آزاد امیدوار کی ریلی میںلاہور رنگ کے کرائم رپورٹر علی مرزا کے ساتھ پولیس گردی کی شدید مذمت کی ہے ۔

این اے 126 میں آزاد امیدوار کی ریلی کے دوران ایس ایچ او نواب ٹائون اسد عباس اور ایس ایچ او جوہر ٹائون ذکا نے لاہور رنگ کے کرائم رپورٹر علی مرزا کو کوریج سے روک دیا ، کیمرہ چھیننے کی کوشش اور سنگین نتائج کی دھمکیاں بھی دیں ۔ لاہورپریس کلب کی گورننگ باڈی نے واقعہ پر شدید افسوس کا اظہار کرتے ہوئے کہاکہ صحافی معاشرے کا آئینہ ہوتے ہیں، وہ معاشرے میں وقوع پذیر ہونے والے واقعات کو پیش کرتے ہیں جس سے معاشرے میں سدھار آتاہے لیکن انھیں اس طرح زبردستی ان کے فرائض منصبی سے روکناانتہائی قابل مذمت عمل ہے جسے کسی صورت برداشت نہیں کیا جائے گا۔

(جاری ہے)

انہوں نے کہاکہ پولیس ملازمین کا یہ رویہ آئی جی پنجاب اور ڈی آئی جی آپریشنزکی کارکردگی پر سوالیہ نشان ہے اور حکام بالا سے مطالبہ کیا کہ اس واقعہ میں ملوث پولیس ملازمین کے خلاف فوری کارروائی عمل میں لائی جائے بصورت دیگر احتجاج کا راستہ اختیار کیا جائے گا۔