این اے 105، پی پی 234 کے امیدواروں کی کاغذات نامزدگی مسترد ہونے کیخلاف درخواستیں خارج

منگل 30 جنوری 2024 16:52

اسلام آباد (اُردو پوائنٹ اخبارتازہ ترین - این این آئی۔ 30 جنوری2024ء) سپریم کورٹ نے الیکشن ٹربیونل اور لاہور ہائی کورٹ کے فیصلوں کو برقرار رکھتے ہوئے حلقہ این اے 105 ٹوبہ ٹیک سنگھ، پی پی 234 وہاڑی کے امیدواروں کی کاغذات نامزدگی مسترد ہونے کیخلاف درخواستیں خارج کردیں۔چیف جسٹس قاضی فائز عیسیٰ کی سربراہی میں 3 رکنی بینچ نے سماعت کی، دوران سماعت الیکشن کمیشن کے حکام نے بتایا کہ انتخابات کے لیے 1500 ٹن خصوصی پیپر امپورٹ کیا، عام انتخابات کے لیے خصوصی بیلٹ پیپر تیار کیے ہیں، 17 ہزار سے زائد امیدواروں کے نام بیلٹ پیپرز میں شامل ہیں، وہاڑی میں پولنگ کے لیے بیلٹ پیپرز چھپ چکے ہیں۔

جسٹس محمد علی مظہر نے کہا کہ لاہور ہائی کورٹ نے 13جنوری کو حکم دیا آپ 26جنوری کو سپریم کورٹ آئے، چیف جسٹس نے وکیل اظہر صدیق سے استفسار کیا کہ ہائی کورٹ کے فیصلے کے خلاف اتنی تاخیر سے سپریم کورٹ کیوں آئی ۔

(جاری ہے)

وکیل نے بتایا کہ مجھے تصدیق شدہ حکمنامہ 19جنوری کو ملا جس پر جسٹس محمد علی مظہر نے کہا کہ اب تو بیلٹ پیپرز بھی چھپ چکے ہیں۔چیف جسٹس نے درخواست گزار این اے 105 کے امیدوار سے استفسار کیا کہ کیا آپ کی دوہری شہریت ہی درخواست گزار نے بتایا کہ جی میں نے برطانوی شہریت چھوڑ دی ہے۔

چیف جسٹس نے کہا کہ شہریت چھوڑنے کا کوئی ریکارڈ دکھائیں جس پر درخواست گزار بولے ریکارڈ ابھی موجودہ نہیں ہے جس پر چیف جسٹس ریمارکس دیے آپ کچھ عرصہ پاکستان میں گزاریں، لوگوں کے مسائل سمجھیں۔