پرویز الٰہی کی اہلیہ قیصرہ الٰہی کا سپریم کورٹ سے رجوع

گجرات سے قومی اسمبلی کے حلقہ این اے 64 کے نتائج کو چیلنج کردیا

ساجد علی بدھ 28 فروری 2024 17:36

پرویز الٰہی کی اہلیہ قیصرہ الٰہی کا سپریم کورٹ سے رجوع

اسلام آباد ( اُردو پوائنٹ اخبارتازہ ترین۔ 28 فروری2024ء ) پاکستان تحریک انصاف کے صدر چوہدری پرویز الٰہی کی اہلیہ قیصرہ الٰہی نے سپریم کورٹ سے رجوع کرتے ہوئے گجرات سے قومی اسمبلی کے حلقہ این اے 64 کے نتائج کو چیلنج کردیا۔ تفصیلات کے مطابق سابق وزیراعلیٰ پنجاب پرویز الہٰی کی اہلیہ قیصرہ الہٰی نے این اے 64 کے نتائج کو سپریم کورٹ میں چیلنج کیا ہے، اس حوالے سے دائر درخواست میں استدعا کی گئی ہے کہ قیصرہ الہٰی کو انتخابات میں کامیاب امیدوار ڈکلئیر کیا جائے، انتخابی رزلٹ فارم 45 کے مطابق جاری کیا جائے اور این اے 64 سے کامیاب امیدوار کے نوٹی فکیشن کو کالعدم قرار دیا جائے۔

پاکستان تحریک انصاف کی حمایت یافتہ آزاد امیدوار نے مؤقف اپنایا ہے کہ انتخابی عمل میں درخواست گزار کے انتخابی عمل میں مختلف اقدامات کے زریعے رکاوٹیں کھڑی گئیں، میرے پاس تمام فارم 45 موجود ہیں، فارم 45 کے مطابق مجھے 1لاکھ 61 ہزار 976 ووٹ حاصل کیےجب کہ کامیاب قرار دئیے جانے والے امیدوار نے صرف 30 ہزار 721 ووٹ لیے۔

(جاری ہے)

قیصرہ الٰہی نے اپنی درخواست میں کہا ہے کہ درخواست گزار کو فارم 47 کی تیاری کے وقت ار او آفس میں جانے نہیں دیا گیا، میڈیا سے میری ہار کا معلوم ہوا، الیکشن کمیشن نے میری درخواست پر میری موجودگی میں آر او کو انتخابی نتائج تیار کرنے کی ہدایت کی، آر او کے پاس موجود فارم 45 ہمارے فارم 45 سے مختلف تھے، اسی دوران آر او نے دوبارہ گنتی کی درخواست مسترد کردیا، الیکشن کمیشن نے بھی اس حوالے سے دی گئی درخواست کو مسترد کردیا۔

بتایا جارہا ہے کہ الیکشن کمیشن نے گجرات سے قومی اسمبلی کے حلقہ این اے 64 سے مسلم لیگ ق کے رہنما چوہدری سالک حسین کی جیت برقرار رکھتے ہوئے ان کی کامیابی کا نوٹی فکیشن جاری کیا، ووٹوں کی دوبارہ گنتی کے دوران بھی مسلم لیگ ق کے رہنماچوہدری سالک کی جیت برقرار رہی تھی ۔