وفاقی علاقوں میں یونیورسل ہیلتھ کوریج کو یقینی بنانے کے لیے پاکستان نیشنل ہیلتھ سپورٹ پروجیکٹ کی پیشرفت پر جائزہ میٹنگ

جمعہ 8 مارچ 2024 22:59

اسلام آباد(اُردو پوائنٹ اخبارتازہ ترین - این این آئی۔ 08 مارچ2024ء) وزارت نیشنل ہیلتھ سروسز ریگولیشن اینڈ کوآرڈینیشن (این ایچ ایس آر اینڈ سی) میں وفاقی سیکریٹری افتخار علی شلوانی کی زیر صدارت ایک اجلاس منعقد ہوا جس میں وفاقی علاقوں میں ہیلتھ کوریج کو یقینی بنانے کے لیے پاکستان نیشنل ہیلتھ سپورٹ پروجیکٹ پر ہونے والی پیش رفت کا جائزہ لیا گیا۔

میٹنگ میں نمائندہ ورلڈ بینک (WB)، مناو بھٹاری، نمائندہ گلوبل فنانسنگ فیسلٹیز (GFF)، غزنہ صدیقی اور ڈائریکٹر پروگرامز وزارت نیشنل ہیلتھ سروسز ریگولیشن اینڈ کوآرڈینیشن ڈاکٹر مریم سرفراز نے شرکت کی۔ پاکستان نیشنل ہیلتھ سپورٹ پروجیکٹ ایک تین سالہ پروجیکٹ ہے جو وزارت نیشنل ہیلتھ سروسز ریگولیشن اینڈ کوآرڈینیشن اسلام آباد کیپیٹل ٹیریٹری (ICT)، گلگت بلتستان (GB) اور آزاد جموں و کشمیر (AJK) کے محکمہ صحت کے ذریعے چلا رہا ہے۔

(جاری ہے)

اس پروجیکٹ کا مقصد صحت کے نظام کو مضبوط بنانا اور اسلام آباد، گلگت بلتستان اور آزاد جموں کشمیر کے تین اضلاع میں صحت کے ضروری پیکیج (EPHS) کو نافذ کرنے کے ساتھ ساتھ عوام کو صحت کی ضروری خدمات فراہم کرنا ہے۔ولڈ بینک اور گلوبل فنانسنگ فیسلٹیز کے نمائندوں نے وزارت کو ان کی تنظیموں کی جانب سے پسماندہ اور دیہی علاقوں میں بہتر یونیورسل ہیلتھ کوریج (UHC) کے منصوبے پر عمل درآمد کے لیے تعاون جاری رکھنے کا یقین دلایا۔

وفاقی سیکرٹری وزارت نیشنل ہیلتھ سروسز ریگولیشن اینڈ کوآرڈینیشن نے کہا کہ پروجیکٹ کمیونٹیز کو صحت کی ضروری خدمات فراہم کرنے کو یقینی بنائے گا اور ہدف بنائے گئے علاقوں کے بنیادی مراکز صحت کی مجموعی حالت کو بہتر بنانے میں اہم کردار ادا کرے گا۔ انہوں نے پروجیکٹ پر ہونے والی پیش رفت پر اطمینان کا اظہار کیا اور متعلقہ حکام کو ہدایت جاری کی کہ وہ تمام ضروری وسائل بروئے کار لاتے ہوئے پراجیکٹ کی تکمیل میں تیزی لائیں تاکہ آئی سی ٹی، اے جے کے اور جی بی کے لوگ جلد از جلد اس پروجیکٹ کے ثمرات سے مستفید ہو سکیں۔