آصف زرداری سندھ سے مسلسل پانچویں صدر مملکت

20جون 2001کو پرویز مشرف کے صدر بننے کے بعد سے عہدہ صدارت سندھ کی شخصیات کے پاس ہی رہا ہے

ہفتہ 9 مارچ 2024 23:00

آصف زرداری سندھ سے مسلسل پانچویں صدر مملکت

کراچی(اُردو پوائنٹ اخبارتازہ ترین - این این آئی۔ 09 مارچ2024ء) 20 جون 2001 کو سابق آرمی چیف پرویز مشرف کے صدر بننے سے مارچ 2024 آصف علی زرداری کے منتخب ہونے کے بعد گزشتہ 23 سال سے عہدہ صدارت صوبہ سندھ کی شخصیات کے پاس ہی رہا ہے۔پیپلزپارٹی کے رہنما آصف علی زرداری دوسر ی مدت کیلیے صدر منتخب ہوگئے ہیں، یہ پاکستانی تاریخ میں پہلے سویلین ہیں جو دوسری مرتبہ اس عہدے کے لیے منتخب ہوئے ہیں۔

(جاری ہے)

وہ اس حوالے سے بھی منفرد ہیں کہ وہ دونوں مرتبہ منتخب رکن قومی اسمبلی تھے، وہ سندھ سے تعلق رکھنے والے پانچویں اور دوسرے بلوچی صدر بھی ہیں، فاروق خان لغاری بھی بلوچ تھے۔اب تک صدر مملکت رہنے والوں میں 4 کا تعلق پنجاب، 3 کے پی کے، 4 کا سندھ اور ایک شخصیت کا تعلق مشرقی پاکستان سے تھا۔ پاکستانی تاریخ میں 13صدر گزرے ہیں جس میں پانچ فوج سے ایک بیوروکریٹ ایک سابق جج اور دیگر کا تعلق سیاست سے رہا ہے، اس میں فوج سے تعلق رکھنے والی شخصیات کو ایک سے زائد مرتبہ صدر منتخب ہونے کا موقع ملا۔