رینجرزاور پولیس کی کندھ کوٹ میں کارروائی3مشتبہ ملزمان گرفتار

کراچی (اُردو پوائنٹ اخبارتازہ ترین - آن لائن۔ 25 مارچ2024ء) پاکستان رینجرزسندھ اور پولیس کی اندرون سندھ کچے کے علاقے میں ڈکیتوں اور جرائم پیشہ افراد کے خلاف کاروائیاں جاری ہیں۔ اندرون سندھ ضلع کندھ کوٹ تحصیل تنگوانی کے علاقے میں پاکستان رینجرزسندھ اور پولیس نے خفیہ معلومات کی بنیاد پر مشترکہ کارروائی کرتے ہوئی3مشتبہ ملزمان کو گرفتار کر کے کوکاری، نندوانی، بنگلانی اور چولیانی گینگ کی 15سے زائدپناہ گاہوں کو بھی مسمار کر دیا گیا۔

آپریشن گزشتہ دنوں اندرون سندھ کشمور کے پرائمری اسکول میں تعینات ٹیچراللہ رکھیو نندوانی کے قتل کی سہولت کاری میں ملوث افراد کی گرفتاری کے لئے کیا گیا، گرفتار ملزمان میں نندوانی گینگ کا سر غنہ خانونندوانی بھی شامل ہے۔یہ گینگ کشمور کے مختلف علاقوں جس میں ٹھل، تنگوانی، انڈس ہائی وے اور دیگر علاقوں میں مجرمانہ سرگرمیوں میں ملوث ہے۔

(جاری ہے)

پاکستان رینجرز سندھ کی جانب سے ڈاکوئوں کے مکمل خاتمے تک آپریشن کا سلسلہ جاری رکھا جائے گا۔گرفتار ملزمان کو مزید قانونی کاروائی کے لیئے پولیس کے حوالے کر دیا گیاہے۔عوام ڈاکوئوں کو پناہ دینے والے عناصر اور دیگر بااثر افراد کی نشاندہی کریں اور سندھ کو جرائم پیشہ افراد سے پاک کرنے میں سندھ رینجرز کی مدد کے لیے رینجرز ہیلپ لائن 1101 یا رینجرز مددگار واٹس ایپ نمبر 03479001111 پر کال یا ایس ایم ایس کے ذریعے فوری اطلاع دیں۔ آپ کا نام صیغہ راز میں رکھا جائے گا۔#