حکومت کا تعلیمی نصاب میں ماحولیاتی بہتری کے مضامین شامل کرنے کا فیصلہ

لاہور ( اردوپوائنٹ اخبارتازہ ترین ۔ 28 مارچ 2024ء) حکومت پنجاب نے تعلیمی نصاب میں ماحولیاتی بہتری کے مضامین شامل کرنے کا فیصلہ کرلیا ہے، سینئر صوبائی وزیر پنجاب مریم اورنگزیب نے کہا کہ چھ جون سے فیز وائز پلاسٹک بیگز کو بین کردیا جائے گا، پری سموگ اور سیزن سموگ کے خاتمے کیلئے کام شروع کردیا گیا ہے۔ تفصیلات کے مطابق وزیراعلیٰ پنجاب مریم نواز کی ہدایت پر سینئر وزیر مریم اورنگزیب نے ماہر ماحولیات وکلائمیٹ چینج  پرویز حسن سے ملاقات کی۔

ملاقات میں پنجاب خصوصاً لاہورمیں ائیر کوالٹی انڈیکس میں بہتری اور ماحولیاتی چیلنجزکے حوالے سے معامالات زیر بحث آئے۔ ماہر ماحولیات پرویز حسن نے انسداد سموگ سے متعلق اہم تجاویز پیش کیں۔ سینئر وزیر پنجاب مریم اورنگزیب نے اپنی گفتگو میں کہا کہ وزیراعلیٰ مریم نواز شریف کی قیادت میں سموگ  لیجسلیشن پلان بنایا گیا ہے جس کے تحت تمام ادارے اپنی تمام تر توانائیوں کے ساتھ ملکر کر کام کررہے ہیں۔

(جاری ہے)

پولیتھین بیگز کے ماحول پر منفی اثرات کے باعث 6 جون سے فیز وائز پلاسٹک بیگز کو بین کردیا جائے گا۔ انہوں نے کہا کہ پری سموگ اور سیزن سموگ کے خاتمے کے حوالے سے پہلے سے ہی لائحہ عمل متعین کرکے کام شروع کردیا گیا ہے۔ سموگ کے خاتمے، ماحولیات سے متعلق قانون سازی اور قوانین کی بہتری پر کام کررہے ہیں۔ سینئر وزیر پنجاب مریم اورنگزیب نے کہا کہ وزیراعلی مریم نوازشریف نے صوبے کی تاریخ کی سب سے بڑی مہم ’پلانٹ فار پاکستان‘کا آغاز کیا ہے۔

نجی شعبے کے تعاون سے ماحولیاتی بہتری کے لئے اقدامات کررہے ہیں ۔ تعلیمی نصاب میں بھی ماحولیاتی بہتری کے مضامین شامل کئے جارہے ہیں۔ مریم اورنگزیب نے کہا کہ پنجاب کو پاکستان کا پہلا ڈیجیٹل صوبہ بنارہے ہیں، 40 سے زائد خدمات گھر کی دہلیز پر فراہم کریں گے۔