وہ اسلامی ملک جہاں سب سے پہلے شوال کا چاند نظر آ گیا

کراچی ( اُردو پوائنٹ اخبارتازہ ترین۔ 09 اپریل 2024ء ) وہ اسلامی ملک جہاں سب سے پہلے شوال کا چاند نظر آ گیا، خلیجی ملک متحدہ عرب امارات میں منگل کی صبح کو 10 بجے ہی سائنسی آلات کی مدد سے چاند کی تصویر حاصل کر لی گئی۔ متحدہ عرب امارات سمیت تمام خلیجی ممالک میں گزشتہ روز شوال کا چاند نظر نہیں آیا تھا۔ دوسری جانب پاکستان میں کراچی اور کوہلو سمیت ملک کے کئی علاقوں سے شوال کے چاند کی شہادتیں موصول ہوئی ہیں۔

میڈیا رپورٹس کے مطابق رویت ہلال کمیٹی شہادتوں کا جائزہ لینے میں مصروف ہے۔ چاند کی رویت کا حتمی اعلان مرکزی رویت ہلال کمیٹی کرے گی۔ واضح رہے کہ محکمہ موسمیات نے عید کے چاند سے متعلق پیشن گوئی کی تھی کہ پاکستان میں آج شوال کا چاند نظر آنے کا قومی امکان ہے اور عید الفطر بروز بدھ 10 اپریل کو ہونے کی توقع ہے۔

(جاری ہے)

محکمہ موسمیات نے کہا کہ آج ملک کے زیادہ تر مقامات پر مطلع صاف رہنے کا امکان ہے تاہم شمالی علاقوں میں مطلع ابرآلود ہوسکتا ہے جب کہ نئے چاند کی پیدائش 8 اپریل کو رات 11 بج کر 21 منٹ پر ہوچکی ہے، اسی لیے ملک میں آج چاند نظر آنے کے امکانات ہیں کیوں کہ 9 اپریل کو چاند کی عمر 19 سے 20 گھنٹے ہوجائے گی، غروب آفتاب کے بعد چاند نظر آنے کا دورانیہ 50 منٹ سے زائد ہو گا۔

واضح رہے کہ پاکستان میں عید الفطر کا چاند دیکھنے کیلئے مرکزی رویت ہلال کمیٹی کا اجلاس اسلام آباد میں جاری ہے۔ چئیرمین رویت ہلال کمیٹی مولانا عبدالخبیر آزاد کی سربراہی میں اجلاس ہو رہا ہے۔ اجلاس میں شوال کا چاند دیکھنے کی شہادتیں وصول کی جا رہی ہیں، اجلاس میں رویت ہلال کمیٹی ممبران اور محکمہ موسمیات سپارکو سائنس ٹیکنالوجی حکام شریک ہیں، رویت ہلال کمیٹی اجلاس وزارت مذہبی امور میں ہو رہا ہے، زونل رویت ہلال کمیٹیوں کے اجلاس مقررہ مقامات پر ہو رہے ہیں۔

یاد رہے کہ گزشتہ روز سعودی عرب میں شوال کا چاند نظر نہیں آیا تھا، سعودی رویت ہلال کمیٹی نے شوال کے چاند کی رویت سے متعلق حتمی اعلان کیا اور بتایا کہ مملکت کے کسی علاقے سے شوال کے چاند کی کوئی شہادت موصول نہ ہوئی لہذا مملکت مین رمضان المبارک کے 30 روزوں کے بعد عید الفطر 10 اپریل بروز بدھ کو منائی جائے گی۔ جبکہ متحدہ عرب امارات، قطر، کویت، بحرین، ایران ، برطانیہ، آسٹریلیا میں بھی گزشتہ روز شوال کا چاند نظر نہ آنے ے باعث عید الفطر 10 اپریل بروز بدھ کو منانے کا اعلان کیا گیا۔