پاکستان نے 1 ارب ڈالر کے یورو بانڈز کی ادائیگی کردی

کراچی ( اُردو پوائنٹ اخبارتازہ ترین۔ 13 اپریل 2024ء ) پاکستان کی جانب سے 1 ارب ڈالر کے یورو بانڈز کی ادائیگی کردی گئی۔ تفصیلات کے مطابق سٹیٹ بینک آف پاکستان (ایس بی پی ) نے پاکستان کے بین الاقوامی بانڈ پر ایک ارب ڈالر بمع منافع کامیابی سے ادائیگی یقینی بنائی ہے، اس حوالے سے جاری بیان میں کہا گیا ہے کہ ایس بی پی نے پاکستان کے بین الاقوامی بانڈ پر ایک ارب ڈالر بمعہ منافع کی ادائیگی 12 اپریل کو کامیابی سے یقینی بنائی، بانڈز ہولڈر میں رقم کی تقسیم کےلئے یہ ادائیگی ایجنٹ بینک کو کی گئی۔

بتایا گیا ہے کہ ملک کے زرمبادلہ کے ذخائر میں رواں مالی سال کے دوران 4 ارب ڈالرسے زیادہ اضافہ ریکارڈ کیا گیا ہے، گزشتہ مالی سال کے اختتام پرملکی زرمبادلہ کے ذخائر کا مجموعی حجم 9.335 ارب ڈالر تھا، 30 جون 2023ء کوختم ہونے والے مالی سال کے اختتام پرسٹیٹ بینک کے پاس زرمبادلہ کے ذخائر کا حجم 3.912 ارب ڈالر اورکمرشل بینکوں کے پاس زرمبادلہ کے ذخائرکاحجم 5.423 ارب ڈالرتھا۔

(جاری ہے)

معلوم ہوا ہے کہ رواں مالی سال کے آغازسے اب تک زرمبادلہ کے ذخائرمیں مجموعی طورپر4.044 ارب ڈالر اضافہ ہوا ہے، سٹیٹ بینک کی جانب سے گزشتہ ہفتے کے اختتام پرجاری اعدادوشمارکے مطابق 29 مارچ کوختم ہونے والے ہفتے میں ملکی زرمبادلہ کے مجموعی ذخائر کا حجم 13.379 ارب ڈالر ریکارڈ کیا گیا، جس میں سٹیٹ بینک کے پاس زرمبادلہ کے ذخائر کا حجم 8.040 ارب ڈالر اوربینکوں کے پاس زرمبادلہ کے ذخائر کا حجم 5.339 ارب ڈالر تھا، تاہم اس ادائیگی سے اسٹیٹ بینک کے ذخائر کم ہو کر تقریبا 7 ارب ڈالر رہ گے لیکن پاکستان کو آئی ایم ایف کی جانب سے رقم موصول ہونے کی توقع ہے۔

بتایا جارہا ہے کہ گزشتہ ماہ پاکستانی حکام نے 3 ارب ڈالر کے اسٹینڈ بائی انتظامات کے دوسرے اور حتمی جائزے پر عملے کی سطح کا معاہدہ کیا تھا، آئی ایم ایف ایگزیکٹو بورڈ کا اجلاس اپریل کے آخر میں ہوگا جس میں منظوری سے پاکستان کو ایس بی اے کی آخری قسط کے طور پر تقریبا 1.1 بلین ڈالر کے فنڈز حاصل ہرنے کا امکان ہے۔