آصفہ بھٹو زرداری کو بلا مقابلہ منتخب کرانے کیلئے پی ٹی آئی امیدوار پر تشدد کیا گیا، بیرسٹرگوہر

پیر 15 اپریل 2024 21:22

اسلام آباد (اُردو پوائنٹ اخبارتازہ ترین - آن لائن۔ 15 اپریل2024ء) پاکستان تحریک انصاف (پی ٹی آئی) کے چیئرمین بیرسٹر گوہر خان نے کہا ہے کہ آصفہ بھٹو زرداری کو بلا مقابلہ منتخب کرانے کیلئے پی ٹی آئی امیدوار پر تشدد کیا گیا۔پارلیمنٹ ہاوس میں میڈیا سے گفتگو میںانہوں نے کہا کہ بدقسمتی سے یہ لوگ ذوالفقار علی بھٹو کے نظریات فالو کرنا بھول گئے ہیں،جس کے پاس مینڈیٹ نہ ہو اس کے خلاف احتجاج بنتا ہے۔

(جاری ہے)

پی ٹی آئی چیئرمین نے مزید کہا کہ انہوں نے ہمارے امیدوار کو تشدد کر کے بٹھایا، آصفہ بھٹو کو بلامقابلہ منتخب کرایا، یہ ان لوگوں کی بدقسمتی ہے کہ موروثی سیاست چاہتے ہیں۔ان کا کہنا تھا کہ بہتر ہوتا یہ اپنی قابلیت پر آتیں، سوچتا تھا یہ ذوالفقار علی بھٹو کے نظریات کو فالو کریں گے، بدقسمتی سے یہ نظریات بھول گئے۔بیرسٹر گوہر نے یہ بھی کہا کہ ہم نہیں چاہتے کہ ہم احتجاج کریں، ہماری کوشش ہے کہ آگے کی طرف بڑھیں، ہمیں مجبور کیا جا رہا ہے، اس کے بغیر کوئی چارہ نہیں۔انہوں نے کہا کہ جس کے پاس مینڈیٹ نہ ہو اس کے خلاف احتجاج بنتا ہے، ہمارا احتجاج پرامن ہوگا اور تب تک ہوگا جب تک مینڈیٹ واپس نہیں مل جاتا۔