کراچی: لاپتہ بیٹے کی بازیابی کیلئے وہیل چیئر پر عدالت آئی ماں بیہوش

سندھ ہائی کورٹ نے لاپتہ شہری سمیر آفریدی کی بازیابی سے متعلق درخواست کی سماعت کرتے ہوئے سیکریٹری داخلہ سندھ اور ڈی آئی جی انویسٹی گیشن کو طلب کر لیا

منگل 16 اپریل 2024 17:29

کراچی (اُردو پوائنٹ اخبارتازہ ترین - این این آئی۔ 16 اپریل2024ء) سندھ ہائی کورٹ کراچی میں لاپتہ بیٹے کے کیس کی پیروی کے لیے وہیل چیئر پر آئی بزرگ خاتون بے ہوش ہو گئیں، شوہر پانی ڈال کر خاتون کو ہوش میں لانے کی کوشش کرتے رہے۔سندھ ہائی کورٹ نے لاپتہ شہری سمیر آفریدی کی بازیابی سے متعلق درخواست کی سماعت کرتے ہوئے سیکریٹری داخلہ سندھ اور ڈی آئی جی انویسٹی گیشن کو طلب کر لیا۔

عدالت نے وفاقی سیکریٹری داخلہ سے بھی رپورٹ طلب کر لی۔عدالت نے کہا کہ جب جبری گمشدگی کا تعین ہو چکا تو بتایا جائے کہ بندہ کس ادارے کے پاس ہی لاپتہ شہری کی بزرگ والدہ نے کمرہ عدالت میں دہائیاں دیتے ہوئے کہا کہ اگر انصاف نہیں کر سکتے اور سچائی سامنے نہیں لا سکتے تو عدالتیں بند کر دیں۔

(جاری ہے)

جسٹس نعمت اللہ پھلپوٹو نے کہا کہ ہماری ہمدردی آپ کے ساتھ ہے، عدالت آپ کے بیٹے کی بازیابی کے لیے بھرپور کوشش کر رہی ہے۔

سرکاری وکیل نے بتایا کہ سمیر آفریدی جبری طور پر لاپتہ ہے، جس کا جے آئی ٹیز اور ٹاسک فورس اجلاس میں تعین ہو چکا ہے۔جسٹس نعمت اللہ پھلپوٹو نے استفسار کیا کہ تفتیشی افسر کہاں ہی سرکاری وکیل نے بتایا کہ تفتیشی افسر میٹنگ میں شرکت کے لیے اسلام آباد گئے ہوئے ہیں۔محکمہ داخلہ کے فوکل پرسن نے عدالت کو بتایا کہ اہلِ خانہ کی مالی معاونت کے لیے وزیرِ اعلی کو سمری بھیج دی ہے۔جسٹس خادم حسین تنیو نے کہا کہ ایسی باتیں نہ کریں جن کا وجود ہی نہ ہو، ایک تفتیشی افسر کو بچانے کے لیے کتنے لوگ یہاں کھڑے ہیں سرکار سے تنخواہ لے کر صرف تفتیشی افسر کو بچانے کے لیے سب لگے ہوئے ہیں۔