وینزویلا کا ایکواڈور میں اپنا سفارتخانہ اور قونصل خانہ بند کرنے کا اعلان

کاراکاس (اُردو پوائنٹ اخبارتازہ ترین - اے پی پی۔ 17 اپریل2024ء) وینزویلا نے ایکواڈور میں اپنے سفارتخانے اور قونصل خانے کو بند کرنے کا فیصلہ کیا ہے۔شنہوا کے مطابق وینزویلا کے صدر نکولس مادورو نے 5 اپریل کو ایکواڈور کی پولیس کی طرف سے کویٹومیں میکسیکو کے سفارت خانے پر چھاپے کے جواب میں ایکواڈور میں ملک کے سفارت خانے اور قونصل خانے کو بند کرنے کا حکم دیا ہے۔

(جاری ہے)

وینزویلا کے صدر نے کہا کہ اس فیصلے کا محرک ایکواڈور کے صدر ڈینیئل نوبوا کے حالیہ بیانات ہیں جن کا کہنا تھا کہ وہ ایکواڈور کے سابق نائب صدر جارج گلاس کی گرفتاری کے لیے میکسیکو کے سفارت خانے پر چھاپے پر افسوس نہیں کریں گے، جنہیں میکسیکو نے سیاسی پناہ دی تھی۔انہوں نے کہا کہ وینزویلا کے سفارتی اہلکار ایکواڈور واپس نہیں جائیں گے جب تک کہ اس ملک میں بین الاقوامی قانون واضح طور پر بحال نہیں ہو جاتا۔انہوں نے مزید کہا کہ وینزویلا ایکواڈور کو اقوام متحدہ سے نکالنے کی میکسیکو کی تجویز کی مکمل حمایت کرتا ہےجب تک کہ وہ بین الاقوامی برادری سے معافی نہیں مانگتا اور صورت حال کو اس کی اصل قانونی حیثیت پر بحال نہیں کرتا ہے۔