جے یو آئی نے اپنی ہی رکنِ قومی اسمبلی کے خلاف سپریم کورٹ میں اپیل دائر کر دی

بدھ 17 اپریل 2024 17:27

اسلام آباد (اُردو پوائنٹ اخبارتازہ ترین - این این آئی۔ 17 اپریل2024ء) جمعیت علمائے اسلام (ف )نے اپنی ہی رکنِ قومی اسمبلی کے خلاف سپریم کورٹ میں اپیل دائر کر دی۔جے یو آئی نے مخصوص نشست پر صدف احسان کی تقرری کا حکم نامہ سپریم کورٹ میں چیلنج کر دیا۔

(جاری ہے)

درخواست میں موقف اپنایا گیا ہے کہ پارٹی کی طرف سے جمع کرائی گئی فہرست میں صدف احسان کا نام نہیں تھا، پارٹی نے صدف یاسمین کا نام دیا لیکن انہوں نے دلچسپی ظاہر نہیں کی۔

درخواست میں کہا گیا ہے کہ صدف احسان نے کچھ پارٹی عناصر کے مبینہ گٹھ جوڑ سے صدف یاسمین والی نشست حاصل کر لی، الیکشن کمیشن نے انکوائری شروع کی تو صدف احسان نے ہائی کورٹ سے رجوع کر لیا۔جے یو آئی نے کہا کہ پشاور ہائی کورٹ نے صدف احسان کا بطور رکنِ اسمبلی نوٹیفکیشن جاری کرنے کا حکم دیا، پشاور ہائی کورٹ کا فیصلہ آئین اور قانون کے مطابق نہیں، اسے کالعدم قرار دیا جائے۔